جەتىسۋ وبلىسىنىڭ كوكسۋ اۋدانىندا سوڭعى ءۇش جىلدا پايدالانىلماي جاتقان 46,9 مىڭ گەكتار جەر مەملەكەت مەنشىگىنە قايتارىلدى.
بۇگىنگى كۇنگە قايتارىلعان جەرلەردىڭ 30,2 مىڭ گەكتارى نەمەسە 64,4% اينالىمعا تارتىلدى. سونىڭ 16,4 مىڭ گەكتارى كونكۋرس ارقىلى 13,8 مىڭ گەكتارى اۋداننىڭ بارلىق اۋىلدىق وكرۋگتەرىنە قوعامدىق جايىلىم رەتىندە بەرىلدى. بۇل جايىندا وبلىس اكىمى بەيبىت يساباەۆتىڭ اۋدان تۇرعىندارىمەن كەزدەسۋى بارىسىندا بەلگىلى بولدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
وسى رەتتە بيىلعى جىلى 41 ۋچاسكەگە 3 كونكۋرس ۇيىمداستىرىلىپ، 6,4 مىڭ گەكتار جەر تابىستالدى. قايتارلىلعان جەردىڭ قالعان 16,7 مىڭ گەكتارى شارۋا قوجالىعىمەن اينالىسامىن دەگەن ازاماتتارعا كونكۋرس ارقىلى 2026 جىلدىڭ 1 جارتىسىنىڭ سوڭىنا دەيىن بەرىلەتىن بولادى. وسىعان بايلانىستى كوكسۋ اۋدانىنىڭ اگرارلىق باعىتىن ەسكەرە وتىرىپ، بۇل جۇمىستاردى جانداندىرۋ تاپسىرىلدى.
- اۋىل شارۋاشىلىعىندا اۋداندا بيىلعى جىلدىڭ 9 ايىندا 24,3 ملرد. تەڭگەنىڭ ءونىمى ءوندىرىلدى. مۇنداعى ەگىس القاپتارىنىڭ كولەمى 30,7 مىڭ گەكتار. بۇگىنگى كۇنگە 8,8 مىڭ گەكتار بيداي جانە ارپا تولىق ورىلىپ، 17,7 مىڭ توننا استىق باستىرىلدى. 1,8 مىڭ گەكتار جۇگەرىنىڭ 1,4 مىڭ گەكتارى ورىلىپ، 12,5 مىڭ توننا ءونىم جينالدى. سونداي-اق سەبىلگەن 11,5 مىڭ گەكتار مايبۇرشاقتىڭ 8 مىڭ گەكتارى جينالىپ، 18,3 مىڭ توننا ءونىم الىندى. مەملەكەت تاراپىنان بۇل باعىتتا كومەك كورسەتىلىپ، سۋبسيديالار، جەڭىلدەتىلگەن نەسيەلەر بەرىلىپ كەلەدى. اۋدان ديحاندارى وسى مۇمكىندىكتەردى پايدالانىپ، 47 بىرلىك اۋىل شارۋاشىلىعى تەحنيكاسىن ساتىپ الدى. «كەڭ دالا-2» باعدارلاماسى اياسىندا 30 ءوتىنىم بويىنشا 605,8 ملن. تەڭگە جەڭىلدەتىلگەن نەسيە بەرىلدى، - دەدى ب. يساباەۆ.
ءوز سوزىندە ءوڭىر باسشىسى اۋدانداعى سۋارمالى جەرلەردى ءتيىمدى پايدالانۋ ماقساتىنداعى سۋ شارۋاشىلىعى نىساندارىن جاڭعىرتۋ ماسەلەسىنە دە نازار اۋداردى. وسى ماقساتتا يسلام دامۋ بانكىنىڭ قاراجاتى ەسەبىنەن «كوكسۋ اۋدانىنىڭ سۋارۋ جەلىلەرىن قايتا جاڭارتۋ جوباسى» ىسكە اسىرىلۋدا. جوبا 2027 جىلى تولىق اياقتالىپ، سونىڭ ناتيجەسىندە 16 مىڭ گەكتارعا جۋىق اۋماقتا سۋمەن قامتۋ جاقسارتىلادى.
جيىندا ۆەتەريناريا ماسەلەسى دە ءسوز بولدى. ماسەلەن، ۆەتەريناريالىق قىزمەتتىڭ ساپاسىن ارتتىرۋ ماقساتىندا سوڭعى ەكى جىلدا 8 اۋىلدا – قابليسا، العاباس، ەڭبەكشى، مۇقانشى، مۇسابەك، جارلىوزەك، اينابۇلاق، بالپىق بي ەلدى مەكەندەرىندە بلوكتى-مودۋلدىك ۆەتەريناريالىق پۋنكتتەر ورناتىلدى، 4 اۆتوكولىك ساتىپ الىندى.
جالپى ەسەپ بەرۋ جيىنىندا اۋدان حالقىنىڭ ءومىر ءسۇرۋ ساپاسىن ارتتىرۋعا باعىتتالعان شارالار مەن الەۋمەتتىك-ەكونوميكالىق دامۋدىڭ نەگىزگى باسىمدىقتارىنا باستى نازار اۋدارىلدى.
بەيبىت يساباەۆتىڭ ايتۋىنشا، شاعىن جانە ورتا بيزنەستى دامىتۋ - ەكونوميكانىڭ تۇراقتىلىعىن قامتاماسىز ەتۋدىڭ ماڭىزدى فاكتورلارىنىڭ ءبىرى. ماسەلەن، كوكسۋ اۋدانىندا جۇمىس ىستەپ تۇرعان 4,5 مىڭنان استام بيزنەس سۋبەكتىسى بار، وندا 6,5 مىڭ ادام جۇمىسپەن قامتىلعان. بيىلعى جىلعى 1 قازانداعى جاعدايى بويىنشا كاسىپكەرلىكتى قارجىلاي قولداۋ اياسىندا 1,9 ملرد. تەڭگەگە 10 جوبا قارجىلاندىرىلدى.
وبلىس اكىمى حالىقپەن وتكەن جىلعى كەزدەسۋدە تۇرعىندار كوتەرگەن ماسەلەلەردىڭ جاي-جاپسارىنا دا توقتالدى. اتاپ ايتقاندا، بالپىق بي اۋىلىنىڭ تۇرعىنى سالتانات ءابدىراحمانوۆانىڭ اۋىلعا تۇنگى كوشە جارىق شامدارىن ورناتۋ تۋرالى ءوتىنىشى وڭ شەشىمىن تاۋىپ، اۋىل كوشەلەرىنە جارىقتاندىرۋ تىرەكتەرى ورناتىلعان.
كەزدەسۋ بارىسىندا اۋدان تۇرعىندارى وزدەرىن تولعاندىرعان باسقا دا ماسەلەلەرگە قاتىستى سۇراقتار قويدى. ەكى مىڭنان استام ادام تۇراتىن ز.تامشىباي اۋىلىندا تۇرعىنداردى كوپتەن بەرى اۋىزسۋ ماسەلەسى الاڭداتىپ كەلەدى، سەبەبى 1970 جىلدارى سالىنعان سۋ قۇبىرى جەلىلەرى ابدەن ەسكىرىپ، اپاتتار مەن سۋدىڭ ۋاقىتشا توقتاپ قالۋىنا ءجيى سەبەپ بولۋدا. جاۋاپتان بەلگىلى بولعانداي، اۋىلدىڭ سۋمەن جابدىقتاۋ جۇيەسىن قايتا جاڭعىرتۋ جانە جاڭا جەلىلەر سالۋدىڭ جوبالىق-سمەتالىق قۇجاتتاماسى دايىندالعان. جوبانى جۇزەگە اسىرۋ كەلەسى جىلعا جوسپارلانىپ وتىر. سونىمەن قاتار مامبەت اۋىلىندا جەكە تۇرعىن ءۇي سالۋعا ارنالعان 100 جەر ۋچاسكەسىنە ينجەنەرلىك جەلىلەر تارتىلعانىن تىلگە تيەك ەتكەن اۋىل تۇرعىنى ەندى وسى شاعىن اۋداننىڭ اباتتاندىرىلۋى قاشان جۇزەگە اساتىنىن سۇرادى. بۇل رەتتە ءوڭىر باسشىسى اتالعان اۋماقتى اباتتاندىرۋ جوسپاردا بار ەكەنىن، وعان جول سالۋ، كوشە جارىعىن ورناتۋ جانە باسقا دا جۇمىستار كىرەتىنىن جەتكىزدى. «Koksu S&M Company» جشس ءسۇت زاۋىتىنىڭ ديرەكتورى كاسىپورىنعا كارىز جۇيەسىن تارتۋ ءۇشىن «بيزنەستىڭ جول كارتاسى» باعدارلاماسى اياسىندا قولداۋ كورسەتۋدى سۇرادى. قازىر بۇل كاسىپورىندا 60 ادام جۇمىس ىستەيدى، ال وندىرىلەتىن ءونىم كولەمى جىلىنا 1,5 ميلليارد تەڭگەگە جەتەدى. بۇعان دەيىن مەملەكەتتىك قولداۋ ارقىلى زاۋىتقا گاز تارتىلعان بولاتىن. ال كارىز جەلىلەرىنە قاتىستى ماسەلەنى ەگجەي-تەگجەيلى قاراۋ تاپسىرىلدى.
كەزدەسۋ قورىتىندىسى بويىنشا تۇرعىندار قويعان بارلىق سۇراقتارعا جاۋاپتار مەن تۇسىنىكتەمەلەر بەرىلدى.
اتاپ وتسەك، وسى كۇنى ازاماتتار ءۇشىن جەكە قابىلداۋ وتكىزىلدى. قابىلداۋ بارىسىندا تۇرعىندار نەگىزىنەن اباتتاندىرۋ ماسەلەلەرىن كوتەردى. مىسالى، قىزىلتوعان اۋىلىنىڭ تۇرعىنى لابيلدانوۆ كوشەسىنە كوشە جارىعىن ورناتۋ جونىندە ءوتىنىش ايتسا، بالپىق بي اۋىلىنىڭ تۇرعىندارى س. سەيفۋللين كوشەسىندەگى №32, 33 ۇيلەردىڭ اۋلاسىنا بالالار ويىن الاڭىن سالىپ بەرۋدى جانە ت. ءنۇسىپوۆ اتىنداعى شاعىن اۋدانداعى 1980 جىلدارى سالىنعان بەس قاباتتى ءۇيدىڭ شاتىرىن جوندەۋگە قولداۋ كورسەتۋدى سۇرادى. كوتەرىلگەن ماسەلەلەردىڭ شەشىمى قاراستىرىلاتىن بولادى.
اتاپ وتسەك، وسى كۇنى وبلىس اكىمى اۋدان تۇرعىندارىن جەكە ماسەلەلەرى بويىنشا قابىلدادى. سول سياقتى ءوڭىر باسشىسى م. سەڭگىرباەۆ اتىنداعى ورتالىق ساياباقتى اباتتاندىرۋ جوسپارىمەن تانىسىپ، اۋدانعا جۇمىس ىستەۋگە كەلگەن ماماندارعا، سونىڭ ىشىندە دارىگەرلەر مەن پەداگوگتارعا كۇنى كەشە قولدانىسقا بەرىلگەن 20 پاتەرلى تۇرعىن ۇيگە باردى. بۇل ەكى نىسان دا بالپىق بي اۋىلىندا ورنالاسقان.
