كەربۇلاق اۋدانى كوكسۋ وزەنىندەگى سۋ دەڭگەيىنىڭ كۇرت كوتەرىلۋىنە بايلانىستى جوعارعى جانە تومەنگى بوگەتتەر اشىلىپ، گيدروتەحنيكالىق قۇرىلىس نىسانىنداعى جۇمىستار توقتاتىلدى. بۇل تۋرالى كەربۇلاق اۋدانى اكىمىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
«2025 جىلعى 29 ءساۋىر كۇنى ساعات 15:30-دا ۋاقىتشا سۋ وتكىزەتىن قۇرىلعىلاردى ورناتۋ جۇمىستارى بارىسىندا اۋا تەمپەراتۋراسىنىڭ كۇرت جوعارىلاۋىنا جانە سۋ اعىنىنىڭ كەنەتتەن ۇلعايۋىنا بايلانىستى كوكسۋ وزەنىندە سۋدىڭ دەڭگەيى كۇرت كوتەرىلگەنى تىركەلدى. سونىڭ سالدارىنان ۋاقىتشا ارناداعى سۋ دەڭگەيى جوبالىق كورسەتكىشتەردەن اسىپ ءتۇستى. ۋاقىتشا ارنانىڭ شايىلىپ كەتۋىنىڭ الدىن الۋ جانە قۇرىلىس تەحنيكاسىنىڭ زاقىمدانباۋى ءۇشىن كوكسۋ وزەنىنىڭ نەگىزگى ارناسىنداعى جوعارعى جانە تومەنگى بوگەتتەردى اشۋ تۋرالى جەدەل شەشىم قابىلداندى. سۋ دەڭگەيى تومەندەگەنگە دەيىن گيدروتەحنيكالىق نىسانداعى جۇمىستار ۋاقىتشا توقتاتىلدى»، – دەلىنگەن حابارلامادا.
بارلىق شارالار قاۋىپسىزدىك تالاپتارىنا ساي جۇزەگە اسىرىلىپ جاتىر. جاۋاپتى قىزمەتتەردىڭ مالىمەتىنشە، كوكسۋ وزەنى ادام ءومىرى مەن قورشاعان ورتاعا قاۋىپ توندىرمەيدى. جۇمىستاردىڭ قايتا باستالۋى تۋرالى قوسىمشا حابارلاناتىن بولادى.
