4–9 جەلتوقسان ارالىعىندا الماتى قالاسىنداعى ADD ارەناسىندا 2010–2011 جىلى تۋعان جاسوسپىرىمدەر اراسىندا بوكستان قازاقستان رەسپۋبليكاسىنىڭ چەمپيوناتى ءوتتى. اتالعان ەل بىرىنشىلىگىنە ايماقتىق ىرىكتەۋ جارىستارىندا ۇزدىك ناتيجە كورسەتكەن، ەلىمىزدىڭ ءار وڭىرىنەن جينالعان ەڭ مىقتى جاس بوكسشىلار قاتىستى. تۋرنير بارىسىندا سپورتشىلار چەمپيون اتاعى ءۇشىن عانا ەمەس، سونىمەن قاتار جاسوسپىرىمدەر ۇلتتىق قۇراماسىنىڭ ساپىنا ىرىكتەلۋ جولداماسىن دا ساراپقا سالدى.
جارىس جاس بوكسشىلاردىڭ شەبەرلىگىن شىڭداپ، ولاردى حالىقارالىق دەڭگەيدەگى ءىرى ستارتتارعا دايىنداۋداعى ماڭىزدى كەزەڭدەردىڭ ءبىرى سانالادى. چەمپيونات بارىسىندا قاتىسۋشىلار جوعارى دايىندىق دەڭگەيىن، تەحنيكالىق جانە تاكتيكالىق مۇمكىندىكتەرىن كورسەتىپ، تارتىستى جەكپە-جەكتەر وتكىزدى.
چەمپيونات قورىتىندىسى بويىنشا 14 سالماق دارەجەسىندە جەڭىمپازدار مەن جۇلدەگەرلەر انىقتالدى. بارلىق سالماق دارەجەلەرى بويىنشا جۇرگىزىلگەن جالپىكوماندالىق ەسەپتە جامبىل وبلىسىنىڭ قۇراماسى ۇزدىك ناتيجە كورسەتىپ، ءبىرىنشى ورىندى يەلەندى. كوماندا قورجىنىنا بارلىعى 7 مەدال ءتۇستى: 4 التىن، 1 كۇمىس جانە 2 قولا جۇلدە.
ەكىنشى ورىنعا شىمكەنت قالاسىنىڭ كومانداسى تۇراقتاپ، 6 مەدال جەڭىپ الدى. ونىڭ ىشىندە 3 التىن، 2 كۇمىس جانە 1 قولا بار. ال ۇزدىك ۇشتىكتى الماتى قالاسىنىڭ قۇراماسى تۇيىندەدى. الاڭ يەلەرى جارىس بويى تۇراقتى ويىن ورنەگىن كورسەتىپ، بارلىعى 9 مەدالعا قول جەتكىزدى: 2 التىن، 2 كۇمىس جانە 5 قولا.
