رەسپۋبليكا كۇنىنە ارنالعان سالتاناتتى جيىندا مەملەكەت باسشىسى قاسىم-جومارت توقاەۆ كونستيتۋتسياعا ەنگىزىلەتىن الداعى وزگەرىستەرگە توقتالدى، دەپ حابارلايدى "ادىرنا" ۇلتتىق پورتالى اقورداعا سىلتەمە جاساپ.
پرەزيدەنتتىڭ ايتۋىنشا، قازاقستان ادىلەتتى ەل قۇرۋ، ياعني مۇمكىندىكتەر مەن پروگرەسس مەملەكەتىنە اينالۋ ماقساتىندا اۋقىمدى جاڭعىرۋ كەزەڭىنە قادام باستى.
«جۋىرداعى جولداۋىمدا پارلامەنت رەفورماسىن باستاۋ تۋرالى ايتتىم. بۇل باستامانى الدىن الا جاريالاۋ – ەلىمىزدەگى ساياسي پروتسەستەردىڭ اشىقتىعىن كورسەتەدى. زاڭ شىعارۋ بيلىگىنىڭ جاڭعىرۋى سوڭعى جىلدارى جۇزەگە اسىرىلعان وزگەرىستەردىڭ زاڭدى جالعاسى بولادى»، – دەدى قاسىم-جومارت توقاەۆ.
مەملەكەت باسشىسى جوسپارلانعان رەفورمالار پارلامەنتتىڭ وكىلەتتىگىن جانە بەدەلىن ارتتىرۋعا باعىتتالاتىنىن ايتتى. وزگەرىستەر تەك پارلامەنتكە عانا ەمەس، پرەزيدەنت ينستيتۋتىنا، ۇكىمەتكە جانە ساياسي جۇيەنىڭ وزگە دە بولىمدەرىنە قاتىستى بولماق.
«تۇزەتۋلەردىڭ اۋقىمىن جانە 2022 جىلعى كونستيتۋتسيالىق رەفورمالار اياسىندا ىسكە اسقان باستامالاردى ەسكەرسەك، بۇل وزگەرىستەردى جاڭا كونستيتۋتسيا قابىلداۋمەن سالىستىرۋعا بولادى»، – دەدى پرەزيدەنت.
سونىمەن قاتار توقاەۆ قازاقستاننىڭ مىقتى پرەزيدەنتتىك باسقارۋ جۇيەسىن ساقتاۋى قاجەت ەكەنىن اتاپ ءوتتى.
«بۇل – ەلىمىزدىڭ تۇراقتىلىعىن قامتاماسىز ەتۋدىڭ ماڭىزدى شارتى. قازىرگى كۇردەلى الەمدە كەيبىر پارلامەنتتىك جۇيەلەر ءوز مىندەتىن ورىنداي الماي وتىر. ءبىز مەملەكەتىمىزدىڭ تۇتاستىعىنا قاۋىپ توندىرمەۋىمىز كەرەك جانە ءۇستىرت ۇسىنىستارعا ەرمەۋىمىز قاجەت»، – دەدى مەملەكەت باسشىسى.
ايتا كەتەيىك، قاسىم-جومارت توقاەۆ پارلامەنتتىك رەفورما جونىندەگى جۇمىس توبىنىڭ العاشقى وتىرىسىندا كونستيتۋتسياعا وزگەرىس ەنگىزىلەتىنىن ايتقان ەدى. سونداي-اق، پرەزيدەنت 8 قىركۇيەكتەگى حالىققا جولداۋىندا قازاقستاندا ءبىر پالاتالى پارلامەنت قۇرۋ مۇمكىندىگىن اتاپ وتكەن بولاتىن
