الماتىدا 18 جاستاعى قىز توعىزىنشى قاباتتىڭ تەرەزەسىنەن قۇلاپ كەتكەن، دەپ حابارلايدى "ادىرنا" ۇلتتىق پورتالى.
كەشە الماتىداعى تۇرعىن ءۇي كەشەندەرىنىڭ بىرىندە 18 جاستاعى بويجەتكەن توعىزىنشى قاباتتىڭ تەرەزەسىنەن قۇلاپ كەتكەن.
بويجەتكەن اۋرۋحاناعا جەتكىزىلدى.
پوليتسيا دەپارتامەنتى بۇل فاكتى بويىنشا سۋيتسيدكە وقتالۋ بابى بويىنشا قىلمىستىق ءىس قوزعالعانىن حابارلادى.
قازىر وقيعانىڭ سەبەبى مەن ءمان-جايى انىقتالىپ جاتىر.
قوعامدىق دەنساۋلىق ساقتاۋ باسقارماسىنىڭ مالىمەتىنشە، پاتسيەنتكە تۇسكەن ساتتەن باستاپ ءومىرىن ساقتاۋ ماقساتىندا شۇعىل حيرۋرگيالىق كومەك كورسەتىلگەن.
«قازىر ناۋقاس انەستەزيولوگيا، رەانيماتسيا جانە قارقىندى تەراپيا بولىمشەسىندە جاتىر. وعان تولىق كولەمدە رەانيماتسيالىق جانە قارسىشوكتىق شارالار جۇرگىزىلۋدە»، — دەلىنگەن باسقارمانىڭ حابارلاماسىندا.
ۆەدومستۆونىڭ دەرەگىنشە، قىزدىڭ جاعدايى وتە اۋىر دەپ باعالانۋدا.
