الماتى وبلىسىندا ورناتىلعان سوڭعى ۇلگىدەگى «SUNQAR» اپپاراتتىق-باعدارلامالىق كەشەندەرى تۋرالى تىڭ دەرەكتەر اتالدى، دەپ حابارلايدى “ادىرنا” ۇلتتىق پورتالى.
وبلىستىق پوليتسيا دەپارتامەنتىنىڭ حابارلاۋىنشا، SUNQAR كامەرالاريا ماشينانى انىق كورۋگە، سونداي-اق ناقتى ۋاقىت رەجيمىندە دەرەكتەردى تالداپ، زاڭ بۇزۋشىلىقتاردى انىقتايتىن ينتەگراتسيالانعان جاساندى ينتەللەكتكە نەگىزدەلگەن.
“كامەرا ءوز ورنىنداعى ەسەپتەۋ قۋاتىن پايدالانا وتىرىپ، زاڭ بۇزۋشىلىقتاردى تىركەيدى، سودان كەيىن ايىپپۇل سالۋ تۋرالى شەشىم قابىلداۋ ءۇشىن ماتەريالداردى قۇزىرلى ورگاندارعا اۆتوماتتى تۇردە جىبەرەدى. كەشەننىڭ باستى ەرەكشەلىكتەرىنىڭ ءبىرى – قۋاتتى ينفراقىزىل پروجەكتوردىڭ بولۋى، ءتىپتى تۇندە دە ساپالى سۋرەتكە تۇسىرۋگە مۇمكىندىك بەرەدى، دەپ اتاپ ءوتتى وبلىستىق پوليتسيا دەپارتامەنتىنىڭ ءباسپاسوز قىزمەتى.
كامەرالار كەلەسى جول قوزعالىسى ەرەجەلەرىن بۇزۋدى تىركەيدى:
– جۇرگىزۋشى مەن الدىڭعى جولاۋشىنىڭ قاۋىپسىزدىك بەلدىكتەرىنىڭ بولماۋى;
– كولىك جۇرگىزۋ كەزىندە ۇيالى تەلەفوندى پايدالانۋ;
– سىرتقى جارىقتاندىرۋ قۇرىلعىلارىن دۇرىس پايدالانباۋ;
– جاياۋ جۇرگىنشىلەر وتكەلىندە جاياۋ جۇرگىنشىلەرگە باسىمدىق بەرمەۋ;
– بەلگىلەنگەن جىلدامدىقتان اسىپ كەتۋ;
– قيىلىستاردىڭ الدىندا تۇتاس سىزىقتى كەسىپ ءوتۋ;
– دۇرىس ەمەس جەردە تۇراق نەمەسە توقتاۋ;
– تىيىم سالىنعان باعدارشام ارقىلى ءجۇرۋ;
– بولىنگەن جولاقتاردا ءجۇرۋ.
جاساندى ينتەللەكت كامەرالارى الماتى وبلىسىندا ءبىر اپتادا 20 مىڭ زاڭ بۇزۋشىلىقتى انىقتادى. بارلىعى SUNQAR كەشەنى جول قوزعالىسى ەرەجەلەرىن بۇزۋدىڭ 25 ءتۇرىن اۆتوماتتى تۇردە تىركەي الادى.
مامىردىڭ 13-ءى مەن 19-ى ارالىعىنداعى ءتارتىپ بۇزۋشىلىق ستاتيستيكاسى جول قوزعالىسى ەرەجەلەرىن بۇزۋدىڭ ايتارلىقتاي كوپ ەكەنىن كورسەتەدى. ءبىر اپتادا 20 مىڭنان استام ءتارتىپ بۇزۋشىلىق تىركەلدى، بۇل جالپى جۇرگىزۋشىلەردىڭ 19,6 پايىزىن قۇرايدى. ەڭ ءجيى كەزدەسەتىن بۇزۋشىلىق قاۋىپسىزدىك بەلدىكتەرىنىڭ بولماۋى بولدى. SUNQAR كامەرالارىن ەنگىزۋ جول قاۋىپسىزدىگىن جاقسارتۋعا، جۇرگىزۋشى ءتارتىبىن قالىپتاستىرۋعا جانە وبلىس جولدارىنداعى ءتارتىپ بۇزۋشىلىق سانىن ازايتۋعا باعىتتالعان، دەپ قوستى پوليتسيا.
مۇنداي كەشەن قازىر اسا قاۋىپتى ۋچاسكەدە – الماتى-كوكپەك-كوكتال تاس جولىنىڭ 30-شى شاقىرىمىندا ورناتىلعان.
