بۇگىن ۇلى جىبەك جولى ساياباعىندا «سپورت كۇنى» مەرەكەسىنە وراي سالتاناتتى شارا ءوتتى. سالاۋاتتى ءومىر سالتىن ناسيحاتتاۋعا ارنالعان ءىس-شاراعا سپورتشىلار، جاتتىقتىرۋشىلار، ارداگەرلەر مەن قالا تۇرعىندارى قاتىستى.
مەرەكەلىك جيىندا الەمدىك دودالاردا تۇركىستاننىڭ اتىن اسقاقتاتقان سپورتشىلاردىڭ جەتىستىكتەرى ناسيحاتتالىپ، سپورت سالاسىنىڭ ارداگەرلەرى مەن سالا ماماندارى، جاس سپورتشىلار ارنايى العىس حاتتارمەن ماراپاتتالدى.
مەرەكەلىك ءىس-شاراعا تۇركىستان قالاسى اكىمىنىڭ ورىنباسارى مەكەنحان قوزىحانۇلى، قالالىق ماسليحات توراعاسى عاپپار امانتايۇلى قاتىسىپ، سپورتشىلاردى، جاتتىقتىرۋشىلاردى جانە قالا تۇرعىندارىن قۇتتىقتاپ، سپورت سالاسىنىڭ جەتىستىكتەرىنە توقتالدى.
ايتا كەتەيىك، تۇركىستان قالاسىندا 265 سپورت نىسانى جۇمىس ىستەيدى. ونىڭ ىشىندە «تۇركىستان ارەنا» ستاديونى، حالىقارالىق تەننيس ورتالىعى، «مۇز سارايى» جانە بەكزات ساتتارحانوۆ اتىنداعى سپورت كەشەنى بار. سونىمەن قاتار، قالادا 2 سپورت سارايى، 3 ستاديون، 5 سپورت كەشەنى، 6 ءجۇزۋ باسسەينى مەن 18 تەننيس كورتى حالىق يگىلىگىنە قىزمەت ەتۋدە.
سونداي-اق، سپورتتىق ينفراقۇرىلىمدى دامىتۋ ماقساتىندا جەرگىلىكتى بيۋدجەت ەسەبىنەن 5 جاڭا سپورت كەشەنىنىڭ قۇرىلىسى ءجۇرىپ جاتىر. ونىڭ ءبىرى – ءا.نۇرماحانوۆ اتىنداعى جاڭا سپورت كەشەنى ەرتەڭ پايدالانۋعا بەرىلمەك.
ۇقساس جاڭالىقتار
