تۇركىستان قالاسىندا 18 دانا قازاندىق پەن ۇزىندىعى 56,3 شاقىرىمدى قۇرايتىن ورتالىقتاندىرىلعان جىلۋ جەلىسى جۇمىس ىستەيدى. 2024-2025 جىلدارداعى جىلۋ بەرۋ ماۋسىمىنان سوڭ بارلىق قازاندىقتاردا جانە جىلۋ جۇيەلەرىندە شايۋ، قىسىمداۋ جۇمىستارى تولىق كولەمدە اتقارىلىپ، جاڭا ماۋسىمعا دايىندىق جۇمىستارى قارقىندى جۇرگىزىلۋدە.
قازىرگى تاڭدا، جىلۋ قازاندىقتارى 2025-2026 جىلدارداعى جىلۋ بەرۋ ماۋسىمىنا تولىق دايىن. ونىڭ ىشىندە 12 قازاندىق اكىمشىلىك-ىسكەرلىك ورتالىق پەن وتىرار شاعىن اۋدانىنداعى كوپقاباتتى تۇرعىن ۇيلەر مەن الەۋمەتتىك نىسانداردى ۇزدىكسىز ىستىق سۋمەن قامتاماسىز ەتىپ وتىر.
سونىمەن قاتار، سپورت، دەنساۋلىق ساقتاۋ، ءبىلىم بەرۋ، مادەنيەت جانە جۇمىسپەن قامتۋدى ۇيلەستىرۋ سالالارىنداعى بارلىق بيۋدجەتتىك مەكەمەلەردىڭ قازاندىقتارى تابيعي گازعا قوسىلعان. قالا اكىمىنىڭ وكىمىمەن ارنايى جۇمىسشى توپ قۇرىلىپ، نىسانداردىڭ جاي-كۇيىن زەردەلەۋ جۇمىستارى جۇرگىزىلدى.
15 تامىز – 31 قىركۇيەك ارالىعىندا جاڭا ماۋسىمعا دايىندىق پاسپورتتارىن راسىمدەۋ جۇمىستارى اتقارىلدى. ناتيجەسىندە قازىرگى تاڭدا 37 مەكتەپ، 28 مەملەكەتتىك مەكەمە جانە 21 بالاباقشا 2025-2026 جىلدارداعى جىلۋ بەرۋ ماۋسىمىنا دايىندىق پاسپورتتارىن الدى.
بۇگىنگى كورسەتكىشتەر بويىنشا تۇركىستان قالاسىندا جىلۋ بەرۋ ماۋسىمىنا دايىندىق جۇمىستارى كەستەگە ساي جۇرگىزىلىپ، قالا تۇرعىندارى مەن الەۋمەتتىك نىسانداردى تۇراقتى جىلۋمەن قامتۋعا بارلىق جاعداي جاسالعان.
ۇقساس جاڭالىقتار
