تۇركىستان قالاسىندا ىبىراي التىنسارين اتىنداعى وبلىستىق بالالار كىتاپحاناسىنىڭ جاڭا زاماناۋي عيماراتى پايدالانۋعا بەرىلدى. اشىلۋ سالتاناتىنا ارنايى قاتىسقان تۇركىستان وبلىسىنىڭ اكىمى نۇرالحان كوشەروۆ كوپشىلىكتى ايتۋلى وقيعامەن قۇتتىقتاپ، ونىڭ قوعام ءۇشىن ماڭىزىنا ەرەكشە توقتالدى.
ءوڭىر باسشىسى ءوز سوزىندە بيىل كىتاپحانانىڭ قۇرىلعانىنا 65 جىل تولىپ وتىرعانىن اتاپ ءوتىپ، مەرەيتوي قارساڭىندا جاڭا عيماراتتىڭ اشىلۋى وبلىس رۋحانياتى ءۇشىن ماڭىزدى تاريحي وقيعا ەكەنىن جەتكىزدى. سونىمەن قاتار جاڭا نىساننىڭ حالىقارالىق بالالاردى قورعاۋ كۇنى قارساڭىندا پايدالانۋعا بەرىلۋى ايماق بالالارىنا جاسالعان ەرەكشە تارتۋ ەكەنىن ايتتى.
– كىتاپحانا – تەك كىتاپ ساقتالاتىن ورىن ەمەس. بۇل – ۇلتتىڭ رۋحاني قازىناسى ءارى تاربيەنىڭ التىن بەسىگى. مەملەكەت باسشىسى قاسىم-جومارت توقاەۆ ۇلتتىق قۇرىلتاي وتىرىسىندا: «تەك كىتاپ وقيتىن ۇلت قانا شىن مانىندە ينتەلەكتۋالدى قوعام قۇرا الادى. بۇل – ەلدىڭ رۋحاني دامۋىنىڭ نەگىزى» دەپ، كىتاپحانا سالاسىنىڭ قوعام ومىرىندەگى ماڭىزىن ايشىقتاپ بەرگەن بولاتىن. اسىرەسە جاستاردىڭ كىتاپقا دەگەن قىزىعۋشىلىعىن وياتىپ، دۇرىس باعىتتا تاربيەلەۋ – بولاشاققا جاسالعان ماڭىزدى ينۆەستيتسيا بولىپ سانالادى. بۇگىنگى ءىس-شارا – وسى باعىتتاعى جۇمىستاردىڭ العىشارتى رەتىندە جۇزەگە اسۋدا. وسىدان ءبىراز ۋاقىت بۇرىن بۇل كىتاپحانانىڭ ەسكى عيماراتىنىڭ جاي-كۇيىن كورىپ، ونى زامان تالابىنا ساي جاڭارتىپ، بالالار ءۇشىن زاماناۋي ينتەللەكتۋالدى ورتالىققا اينالدىرۋ تۋرالى ارنايى باستاما كوتەرگەن ەدىم. وسى يدەيانى ءبىر اۋىزدان قولداپ، بالالارىمىزعا وسىنداي عاجايىپ ءبىلىم ورداسىن سىيلاۋعا مۇمكىندىك تۋعىزعان وبلىستىق ءماسليحات دەپۋتاتتارى مەن باسقا دا ازاماتتارعا شىنايى ريزاشىلىعىمدى بىلدىرەمىن. جاڭا عيمارات قۇتتى بولسىن! كىتاپحانانىڭ شامشىراعى سونبەسىن! ەلىمىزدىڭ رۋحانياتى وركەندەي بەرسىن! – دەگەن نۇرالحان كوشەروۆ جاڭا عيماراتتا بالالاردىڭ ءبىلىمىن شىڭداپ، بوس ۋاقىتىن ءتيىمدى وتكىزۋىنە بارلىق جاعداي جاسالعانىن اتاپ ءوتتى.
ءىس-شارا بارىسىندا ءوڭىر باسشىسى زيالى قاۋىم وكىلدەرىمەن بىرگە جاڭا كىتاپحانا عيماراتىن ارالاپ كوردى.
جاڭا كىتاپحانا بالالاردىڭ وقۋ مادەنيەتىن قالىپتاستىرۋ، بىلىمگە، كىتاپقا دەگەن قىزىعۋشىلىعىن ارتتىرۋ، شىعارماشىلىق قابىلەتىن دامىتۋ، ۇلتتىق قۇندىلىقتاردى دارىپتەۋ ارقىلى رۋحاني باي، وي-ءورىسى كەڭ، تاربيەلى ۇرپاق قالىپتاستىرۋ ماقساتىندا اشىلدى.
جوبانىڭ جالپى قۇنى – 481,336 ملن تەڭگە. عيماراتتىڭ جالپى اۋماعى – 1065,3 شارشى مەتر. كىتاپحانا ءبىر مەزەتتە 100 وقىرمانعا قىزمەت كورسەتۋگە قاۋقارلى. مۇندا 50-دەن استام مامان ەڭبەك ەتەدى.
ايتا كەتسەك، بۇگىندە تۇركىستان وبلىسىندا 390 كىتاپحانا حالىققا قىزمەت كورسەتسە، ونداعى جالپى كىتاپ قورى 6 ميلليوننان اسادى.
ال بۇگىنگى اشىلىپ وتىرعان بالالار كىتاپحاناسىنىڭ قورىندا 226 403 دانا قۇندى كىتاپ ساقتالعان. مۇندا الەمدىك كلاسسيكا، زاماناۋي بالالار ادەبيەتى جانە ەلەكتروندى رەسۋرستاردىڭ بارلىق مۇمكىندىكتەرى قامتىلعان. وڭىردە مادەنيەت پەن رۋحانياتتى دامىتۋ باعىتىنداعى جۇمىستار جۇيەلى تۇردە جالعاسۋدا. وتكەن جىلى وبلىستا كىتاپحانالارمەن قاتار 6 مادەنيەت ءۇيى پايدالانۋعا بەرىلسە، بيىل تاعى 10 مادەني نىساننىڭ قۇرىلىس جۇمىستارى قارقىندى ءجۇرىپ جاتىر. اتالعان نىساندار جىل سوڭىنا دەيىن ەل يگىلىگىنە بەرىلەدى دەپ كۇتىلىپ وتىر.
