تۇركىستان قالاسىندا تۇرعىندار مەن قوناقتارعا جايلى، قولجەتىمدى ءارى قاۋىپسىز قوعامدىق كولىك قىزمەتىن ۇسىنۋ باعىتىندا بۇگىن 16 جاڭا اۆتوبۋس جەلىگە قوسىلدى.
قالا اكىمى ازىمبەك پازىلبەكۇلىنىڭ حالىقپەن كەزدەسۋلەرىندە تۇرعىندار تاراپىنان ايتىلعان ۇسىنىس-پىكىرلەر ەسكەرىلىپ، جاڭا اۆتوبۋستار شەت ايماقتارداعى قاجەتتى مارشرۋتتارعا تولىقتىرىلدى.
جاڭا اۆتوبۋستار زاماناۋي تالاپتارعا ساي بەينەباقىلاۋ كامەرالارىمەن، كونديتسيونەر، ەلەكتروندى بيلەت جۇيەسىمەن جابدىقتالعان. سونداي-اق، مۇمكىندىگى شەكتەۋلى ازاماتتاردىڭ ەركىن قاتىناۋىنا قولايلى بولۋ ءۇشىن ارنايى پاندۋستار دا قاراستىرىلعان.
بۇگىنگى تاڭدا تۇركىستان قالاسىندا 22 باعىت بويىنشا مارشرۋتتار مەن 683 ايالداما بار. اتالعان باعىتتارعا 200-دەن اسا قوعامدىق كولىك كۇندەلىكتى قىزمەت كورسەتۋدە. جىل سوڭىنا دەيىن قالا تۇرعىندارىنىڭ قاجەتتىلىگىن قامتاماسىز ەتۋ ماقساتىندا تاعى 10 جاڭا اۆتوبۋس جەلىگە قوسىلادى دەپ جوسپارلانۋدا.
ۇقساس جاڭالىقتار
