ۇلىتاۋ وبلىسىندا دەمەۋشىلىك قولداۋ ەسەبىنەن الەۋمەتتىك جانە ينفراقۇرىلىمدىق جوبالار تۇراقتى تۇردە ىسكە اسىرىلىپ كەلەدى. بۇل جونىندە وبلىس اكىمى داستان رىسپەكوۆ بۇقارالىق اقپارات قۇرالدارىنا وتكىزگەن ءباسپاسوز ءماسليحاتىندا ايتتى.
اكىم ءوڭىردىڭ دامۋ باعىتتارىن، الەۋمەتتىك-ەكونوميكالىق ءوسىمنىڭ نەگىزگى باسىمدىقتارىن، ينۆەستيتسيالىق جوبالاردى جانە تۇرعىنداردىڭ ءومىر ساپاسىن جاقسارتۋعا ارنالعان باستامالاردى تانىستىردى.
اكىمنىڭ ايتۋىنشا، جىل ىشىندە وبلىستا جالپى قۇنى 60 ميلليارد تەڭگەدەن اساتىن ماڭىزدى الەۋمەتتىك جانە ينفراقۇرىلىمدىق جوبالار جۇزەگە اسىرىلىپ جاتىر. بۇل جۇمىستارعا جەر قويناۋىن پايدالانۋشى كومپانيالاردىڭ، جەكە قورلاردىڭ جانە «قازاقستان حالقىنا» قورىنىڭ دەمەۋشىلىك قاراجاتى جۇمسالماق.
اتاپ ايتقاندا، وڭىردە زاماناۋي كونگرەسس-ورتالىق، وقۋشىلار سارايى، 1500 ورىندىق مۇز ايدىنى مەن ءجۇزۋ باسسەينى، بالالار-جاسوسپىرىمدەر سپورت اكادەمياسى، سپورت-ساۋىقتىرۋ كەشەندەرى، مەشىت، ەمحانا، بالاباقشا جانە باسقا دا نىساندار بوي كوتەرەدى. بارلىعى 33 جوبا جۇزەگە اسىرىلۋدا.
مىسالى، كونگرەسس-ورتالىق ءتۇرلى دەڭگەيدەگى ءىس-شارالاردى – كونفەرەنتسيالار، فورۋمدار، كورمەلەر، كونتسەرتتەر جانە رەسمي قابىلداۋلار وتكىزۋگە ارنالعان كوپسالالى عيمارات بولماق. سونداي-اق عيماراتتى ءتيىمدى پايدالانۋ ءۇشىن مادەنيەت سالاسىنداعى وبلىستىق مەكەمەلەردى وسى نىسانعا ورنالاستىرۋ مۇمكىندىگى قاراستىرىلىپ وتىر.
سونىمەن قاتار، دەمەۋشىلەر ەسەبىنەن دارىگەرلەر مەن مۇعالىمدەردى الەۋمەتتىك قولداۋ شارالارى جۇزەگە اسىپ، سپورت سالاسىن دامىتۋعا دا كوڭىل بولىنبەك.
جاڭا جوسپارلار مەن باستامالار
وبلىستا بۇعان قوسا قۇنى 33,7 ميلليارد تەڭگەنى قۇرايتىن تاعى 14 نىساننىڭ ءتىزىمى بەكىتىلگەن. ونىڭ ىشىندە حوككەي كورتى، جاڭاارقا كەنتىندەگى مادەنيەت سارايى، كەڭگىر جانە تالاپ اۋىلدارىنداعى سپورت-ساۋىقتىرۋ كەشەندەرى، سونداي-اق ساتباەۆ قالاسىنداعى سپورت كەشەنىنىڭ حوككەي كورتىن كۇردەلى جوندەۋ جۇمىستارى بار.
بۇدان بولەك، قۇمكول كەن ورنى اۋماعىندا جەر پايدالانۋشى كومپانيا جەزقازعان قالاسىندا مەملەكەتتىك رامىزدەر اللەياسىن سالىپ، تۋ تۇعىرىن ورناتۋ جوسپارلانۋدا.
اكىمنىڭ ايتۋىنشا، بۇل جۇمىستار ءوڭىر تۇرعىندارىنىڭ جايلى ءومىر سۇرۋىنە جاعداي جاساۋ ماقساتىندا جۇيەلى تۇردە جالعاسادى.
