ەكونوميكالىق ءوسىم بويىنشا شىمكەنت كوش باستاپ تۇر. بۇل تۋرالى energyprom.kz جاريالادى، دەپ حابارلايدى “ادىرنا” ۇلتتىق پورتالى.
بيىلعى ءبىرىنشى جارتىجىلدىقتىڭ قورىتىندىسى بويىنشا، قازاقستان ەكونوميكاسىنىڭ ءوسىمى 3,6 پايىزدى قۇرادى. ايماقتىق كونتەكستە قازاقستان رەسپۋبليكاسىنىڭ 20 ايماعىنىڭ تەك 9-ى عانا رەسپۋبليكا بويىنشا ورتاشا دەڭگەيدەن جوعارى سەرپىندى كورسەتتى. رەسپۋبليكالىق ماڭىزى بار قالالار اراسىندا رەسپۋبليكا بويىنشا ۇزدىك كورسەتكىشتەر شىمكەنتتە (پليۋس 6,3%) تىركەلدى. وڭىرلەر اراسىندا اقمولا (پليۋس 7,6%) جانە اتىراۋ (پليۋس 6,3%) كوش باستادى.
شىمكەنتتى ايتار بولساق، ەڭ ءىرى وڭتۇستىك مەگاپوليس قازاقستاندا جانە الەمدە بولىپ جاتقان داعدارىسقا قاراماستان وڭ دامۋ ديناميكاسىن كورسەتىپ وتىر. اسىرەسە، قالا ەكونوميكاسىنىڭ ناقتى سەكتورى جاقسى كورسەتكىشتەرگە قول جەتكىزدى: قاڭتار-قىركۇيەك ايلارىندا شىمكەنتتىك كاسىپورىنداردىڭ ونەركاسىپ ءونىمىنىڭ كولەمى 666,4 ملرد تەڭگەنى قۇراپ، وتكەن جىلمەن سالىستىرعاندا 6,7%-عا ءوستى.
سونىمەن قاتار، قۇرىلىس يندۋسترياسى وراسان ءوسىم كورسەتتى: بىردەن پليۋس 39,7%، 131,4 ملرد تەڭگەگە دەيىن. تىكەلەي تۇرعىن ۇيلەردى پايدالانۋعا بەرۋ كولەمى 27,5%-عا – 80,2 مىڭنان 507,1 مىڭ شارشى مەترگە دەيىن ءوستى.
ءوز كەزەگىندە بايلانىس قىزمەتتەرىنىڭ كولەمى 4,6%-عا، پوشتا جانە كۋرەرلىك قىزمەت 3,4%-عا ءوستى.
شىمكەنت – قازاقستانداعى حالقىنىڭ سانى بويىنشا ءۇشىنشى ورىندا، ال اۋدانى بويىنشا ءبىرىنشى ورىندا تۇرعان ءىرى ونەركاسىپتىك، ساۋدا جانە مادەني ورتالىقتاردىڭ ءبىرى. 2020 جىلى ول تمد-نىڭ مادەني استاناسى بولدى. قالانىڭ ودان ءارى دامۋ بولاشاعى زور. بۇل جاعدايدا قالاعا قۇيىلعان ينۆەستيتسيا، سونىمەن قاتار ينفراقۇرىلىمدى دامىتۋ ماڭىزدى.
بيىل نەگىزگى كاپيتالعا ينۆەستيتسيا كولەمىنىڭ ءوسىمى بويىنشا شىمكەنت 3 ءوڭىردىڭ قاتارىندا. ماسەلەن، 2022 جىلدىڭ قاڭتار-قىركۇيەك ايلارىنىڭ قورىتىندىسى بويىنشا مۇنداعى ينۆەستيتسيا كولەمى 327,9 ملرد تەڭگەنى قۇرادى. بۇل 2021 جىلدىڭ سايكەس كەزەڭىمەن سالىستىرعاندا 25,8%-عا ارتىق (حقۇ – 120%).
ينۆەستيتسيالار نەگىزىنەن قۇرىلىس جۇمىستارىنا جانە عيماراتتار مەن قۇرىلىستاردى كۇردەلى جوندەۋگە باعىتتالعان – سەگمەنتتىڭ ۇلەسى 81,3% قۇرادى. بارلىق ينۆەستيتسيالاردىڭ 18,3%-ىن ماشينالار، جابدىقتار، قۇرال-سايماندار جانە تاۋارلىق-ماتەريالدىق قۇندىلىقتار قۇرادى.
جالپى، وبلىستاعى قۇرىلىس سالاسى قارقىندى دامىپ كەلە جاتقان سالالاردىڭ ءبىرى. 2022 جىلدىڭ قاڭتار-قىركۇيەك ايلارىندا سەكتورداعى جۇمىستاردىڭ ەڭ كوپ كولەمى تۇرعىن ۇيلەر قۇرىلىسىنا (49,2 ملرد. تەڭگە نەمەسە 37,4%) تيەسىلى. شىمكەنتتە تۇرعىندارعا ارنالعان ۇيلەر دە، ينفراقۇرىلىم نىساندارى دا قارقىندى تۇردە سالىنۋدا.
سونىمەن قاتار، شاھاردا ەلىمىزدەگى ەڭ ۇلكەن يپپودروم سالىنىپ جاتىر. جوبا 1500 ورىندىق شاتىرى بار تريبۋنانى قاراستىرادى. حالىقارالىق ستاندارتتارعا ساي سالىنعان يپپودروم شىمكەنتتەگى جاڭا ينۆەستيتسيالار مەن بيزنەستى دامىتۋدىڭ تارتىمدى ورنىنا اينالۋى ءتيىس. بۇل رەتتە نىسان قۇرىلىسى باستالعالى بەرى جۇمىس كولەمى دە ءبىرشاما ۇلعايعان. يگەرىلەتىن اۋماق 1,5 ەسەگە – 24 گەكتاردان 39 گەكتارعا دەيىن كەڭەيتىلدى. جوبانى BI Group قۇرىلىس كومپانياسى جۇزەگە اسىرۋدا. يپپودروم قۇرىلىسى قۇرىلىس سالۋشىعا 6 ميلليارد تەڭگەدەن استام قارجى جۇمساعان.
بۇگىندە ءوسىپ، دامىپ كەلە جاتقان قالاعا جاڭا ينفراقۇرىلىمدىق نىساندار قاجەت. شىمكەنت حالقىنىڭ سانى وسۋدە، قىركۇيەكتىڭ اياعىندا ول 1,2 ميلليون ادامدى قۇرادى. بۇل وتكەن جىلدىڭ سايكەس كەزەڭىمەن سالىستىرعاندا بىردەن 7,2%-عا كوپ.
ينفراقۇرىلىم مەن تۇرعىن ۇيگە دەگەن فيزيكالىق قاجەتتىلىكتەن باسقا، قالانى اباتتاندىرۋ حالىقتى جۇمىسپەن قامتاماسىز ەتەدى، كاسىپكەرلىكتى دامىتۋدىڭ درايۆەرى بولىپ تابىلادى. قازىر شىمكەنتتە قۇرىلىستا 25,4 مىڭ ادام جۇمىسپەن قامتىلسا، بۇل سالا حالىقتى جۇمىسپەن قامتاماسىز ەتەتىن 5 سالانىڭ قاتارىندا.
سونىمەن قاتار، تىركەلگەن كاسىپورىندار سانى بويىنشا قۇرىلىس ساۋدادان كەيىنگى ەكىنشى سالا بولىپ تابىلادى. ماسەلەن، بيىلعى جىلدىڭ قىركۇيەك ايىنىڭ سوڭىنا قاراي قالاداعى كاسىپورىندار سانى قازىردىڭ وزىندە 4,1 مىڭعا جەتىپ، جىلدىق ءوسىم 4,5 پايىزدى قۇرادى.
