تۇركىستان وبلىسىنداعى «TURAN» ارنايى ەكونوميكالىق ايماعىندا جالپى قۇنى 7 ملرد تەڭگەنى قۇرايتىن جاڭا ءوندىرىس ورنىنىڭ كاپسۋلاسى قالاندى. جوبا اياسىندا «BEREKE PLASTIC» زاۋىتىنىڭ قۇرىلىسى جۇرگىزىلىپ، 7 زاماناۋي وندىرىستىك كەشەن بوي كوتەرمەك. العاشقىسى كەلەر جىلدىڭ اقپان ايىندا ىسكە قوسىلادى. تۇركىستان وبلىسى يندۋستريالاندىرۋ مەن ينۆەستيتسيا تارتۋ باعىتىندا قارقىندى دامىپ كەلەدى. جاڭا ءوندىرىس ورىندارىنىڭ ىسكە قوسىلۋى – ءوڭىردىڭ ەكونوميكالىق دەربەستىگىن ارتتىرىپ، حالىقتىڭ ءومىر ساپاسىن جاقسارتۋعا باعىتتالعان ماڭىزدى قادام. ساۋران اۋدانىنىڭ ورانعاي اۋىلىندا ورنالاسقان زاۋىتتىڭ ىرگەتاسىن قالاۋ راسىمىنە تۇركىستان وبلىسىنىڭ اكىمى نۇرالحان كوشەروۆ قاتىسىپ، جوبانىڭ ءوڭىردىڭ يندۋستريالىق الەۋەتىن ارتتىرۋداعى ماڭىزىن اتاپ ءوتتى.
– مەملەكەت باسشىسى قاسىم-جومارت كەمەلۇلى توقاەۆتىڭ ينۆەستيتسيا تارتۋ جانە جاڭا ءوندىرىس ورىندارىن اشۋ جونىندەگى تاپسىرمالارىن ىسكە اسىرۋ ماقساتىندا وبلىسىمىزدا اۋقىمدى جۇمىستار اتقارىلۋدا. وڭىردە زاۋىتتار مەن فابريكالاردىڭ قۇرىلىسى قارقىن الىپ، جاڭا جۇمىس ورىندارى اشىلىپ جاتىر. سەبەبى ءار جاڭا جوبا – جاڭا مۇمكىندىك، جاڭا تابىس كوزى. قانداي كاسىپورىن اشىلسا دا، ءبىز وعان دايىن بولۋىمىز كەرەك. ەلىمىزدە جۇمىسشى ماماندىقتارىن دامىتۋ مەن ولاردىڭ مارتەبەسىن كوتەرۋگە ەرەكشە نازار اۋدارىلىپ وتىر. شىن مانىندە، جۇمىسشى ماماندىعى – ەل ەكونوميكاسىنىڭ قوزعاۋشى كۇشى. ول جۇمىسسىزدىقتى ازايتىپ قانا قويماي، ءوندىرىستىڭ دامۋىنا جانە حالىقتىڭ ءال-اۋقاتىنىڭ ارتۋىنا تىكەلەي اسەر ەتەدى. بۇگىن ىرگەتاسى قالانعان زاۋىت ىسكە قوسىلعان سوڭ، ءوڭىردىڭ الەۋمەتتىك-ەكونوميكالىق دامۋىنا تىڭ سەرپىن بەرەدى. جوبانىڭ ءساتتى جۇزەگە اسۋى وتاندىق ءونىم كولەمىن ارتتىرۋعا، يمپورتتى الماستىرۋعا جانە بىلىكتى جۇمىسشى كادرلاردىڭ بەدەلىن نىعايتۋعا ىقپال ەتەدى. جاڭا ءوندىرىس ەل يگىلىگىنە قىزمەت ەتسىن، – دەدى تۇركىستان وبلىسىنىڭ اكىمى نۇرالحان كوشەروۆ.
ءوڭىر باسشىسى سونداي-اق بيىل 8 مىڭنان استام تۇلەك ءىرى ينۆەستيتسيالىق جوبالارعا تارتىلاتىنىن اتاپ ءوتتى. قازىر وبلىس بويىنشا جۇزەگە اسىرىلاتىن جوبالارعا 2 290 جۇمىسشى مامان قاجەت. بۇدان بولەك، اگروونەركاسىپ، ەنەرگەتيكا، تەحنيكا جانە قۇرىلىس سالالارى بويىنشا 11 ماماندىق بويىنشا كادر تاپشىلىعى انىقتالعان. وسى باعىتتاردا كوللەدجدەرگە جاڭا ليتسەنزيالار بەرىلىپ، وڭىرگە قاجەتتى جۇمىسشى كادرلاردى دايارلاۋ جۇمىستارى باستالىپ جاتىر.
«BEREKE PLASTIC» زاۋىتىنىڭ ىسكە قوسىلۋى ءوڭىردىڭ عانا ەمەس، تۇتاس ەلدىڭ ەكولوگيالىق جانە ەكونوميكالىق دامۋ ستراتەگياسىمەن ۇندەسەدى. ءبىر رەتتىك ىدىس-اياق شىعارۋ جوباسى – قازاقستاندا سيرەك كەزدەسەتىن باعىتتاردىڭ ءبىرى. بۇل ءوندىرىس وتاندىق نارىقتىڭ سۇرانىسىن قامتاماسىز ەتىپ قانا قويماي، ەكسپورتتىق الەۋەتتى ارتتىرۋعا دا مۇمكىندىك بەرەدى. جاڭا زاۋىتتا جىلىنا 600–700 توننا پلاستيك جانە قاعازدان جاسالعان ءبىر رەتتىك ىدىس-اياق پەن تۇرمىستىق بۇيىمداردىڭ 18 ءتۇرى وندىرىلەدى. كاسىپورىننىڭ ىسكە قوسىلۋى ناتيجەسىندە 65 جاڭا جۇمىس ورنى اشىلادى.
«TURAN» ارنايى ەكونوميكالىق ايماعىنىڭ اۋماعىندا (جالپى كولەمى – 365 گەكتار) بۇگىندە 72 ملرد تەڭگە كولەمىندە ينۆەستيتسيا تارتىلىپ، ءتورت جوبا بويىنشا 500-گە جۋىق جاڭا جۇمىس ورنىن اشۋ جوسپارلانعان. ايماقتىڭ ينفراقۇرىلىمى تولىق دايىن: ينجەنەرلىك جەلىلەر تارتىلىپ، ءوندىرىس نىساندارىن سالۋعا بارلىق جاعداي جاسالعان.
