«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە مەملەكەت باسشىسىنىڭ تاپسىرماسى بويىنشا 32 جۇمىس ىستەپ تۇرعان اۋداندىق ورتالىق اۋرۋحانا جاڭعىرتىلىپ، قايتا جاڭارتىلۋدا، ولار اۋدانارالىق مارتەبەگە يە بولادى.
مۇنداي اۋرۋحانالار بىرنەشە ەلدى مەكەندەردىڭ، سونىڭ ىشىندە كورشى اۋدانداردىڭ تۇرعىندارىنا قىزمەت كورسەتەدى. مۇنداي مارتەبەگە ۇلىتاۋ وبلىسى جاڭاارقا اۋدانىنىڭ كوپبەيىندى اۋداندىق ورتالىق اۋرۋحاناسى (كاوا) يە بولۋى ءتيىس.
بۇگىنگى كۇنى رەسپۋبليكالىق بيۋدجەت قاراجاتى ەسەبىنەن اۋداندىق اۋرۋحانانى كۇردەلى جوندەۋ باستالدى. جوندەۋ جۇمىستارىنىڭ كولەمىنە مىنالار كىرەدى: اۋرۋحانا عيماراتى، ستاتسيونار، وپەراتسيالىق بولمە، اس بلوگى، قابىلداۋ بولىمشەسى.
بۇدان باسقا، ينجەنەرلىك جۇيەلەر (جىلۋ، سۋ، كارىز، ەلەكتر، جەلدەتۋ) تولىعىمەن اۋىستىرىلادى، قاۋىپسىزدىك، ءورت دابىلى جانە بەينەباقىلاۋ جۇيەلەرى جاڭارتىلادى، تولىققاندى جەدەل مەديتسينالىق كومەك قىزمەتى ىسكە قوسىلادى.
اۋقىمدى كۇردەلى جوندەۋدەن كەيىن، مارتەبەسىنە سايكەس اۋدانارالىق كوپبەيىندى اۋرۋحانالار قىزمەت كورسەتە باستايدى: كولەمى كەمىندە 100 توسەك – ورنى بار ستاتسيونار، حيرۋرگيا، تەراپيا، اكۋشەرلىك، پەدياتريا، رەانيماتسيا سياقتى مامانداندىرىلعان بولىمشەلەر.
زاماناۋي زەرتحانالىق جانە دياگنوستيكالىق جابدىقتار (كت، ۋدز، زەرتحانالىق تەحنيكا جانە ت.ب.) ورناتىلادى. جۇمىس ورىندارى كەڭەيىپ، مامانداردى تارتۋ مۇمكىندىگى پايدا بولادى.
اتالمىش اۋرۋحاناعا 2024 جىلى عانا الەۋمەتتىك قولداۋ باعدارلاماسى بويىنشا 7 دارىگەر كەلدى - بۇل ەكى حيرۋرگ، اكۋشەر-گينەكولوگ، جپد، انەستەزيولوگ-رەانيماتولوگ جانە تراۆماتولوگ. سونداي-اق، 170 ملن تەڭگەگە جۋىق سوماعا مەديتسينالىق تەحنيكا مەن جابدىق ساتىپ الىندى. اتالعان باعىتتارداعى جۇمىس جالعاسۋدا.
اۋىل تۇرعىندارى جوعارى بىلىكتى (ەندوسكوپيا، لاپاروسكوپيالىق وپەراتسيالار، تەلەمەديتسينا جانە ت.ب.) كومەك الا باستايدى. اۋرۋحانا كەز كەلگەن جاستاعى پاتسيەنتكە بىلىكتى مەديتسينالىق كومەك كورسەتەتىن ۇلىتاۋ وبلىسىنداعى ەكىنشى نەگىزگى مەديتسينالىق مەكەمە بولادى.
