ۇلىتاۋ وبلىسىندا قازاقستان رەسپۋبليكاسىنىڭ مەملەكەتتىك قىزمەتشىلەر كۇنىنە ارنالعان ماراپاتتاۋ جيىنى ءوتتى. ءىس-شارا اياسىندا مەملەكەتتىك قىزمەت سالاسىنا سۇبەلى ۇلەس قوسقان بىرقاتار ازامات ۆەدومستۆولىق جانە وبلىستىق ماراپاتتارعا يە بولدى.
سالتاناتتى راسىمدە ۇلىتاۋ وبلىسىنىڭ اكىمى داستان رىسپەكوۆ ءسوز سويلەپ، مەملەكەتتىك قىزمەتتىڭ قوعام ومىرىندەگى ماڭىزدى ءرولىن اتاپ ءوتتى.
جيىندا «مەملەكەتتىك قىزمەت ارداگەرى» ۆەدومستۆولىق توسبەلگىسىمەن
جانات مەيرامعاليەۆا ماراپاتتالدى. ول 40 جىلدان استام ۋاقىتىن مەملەكەتتىك قىزمەتكە ارناپ، ەكونوميكا جانە كاسىپكەرلىك سالالارىندا ابىرويلى ەڭبەك ەتتى. زەينەتكەرلىككە شىقسا دا، جاستارعا باعىت-باعدار بەرىپ كەلەدى.
سونىمەن قاتار، «مەملەكەتتىك قىزمەت ارداگەرى» توسبەلگىسىمەن
ايدارحان امانباەۆ تا ماراپاتتالدى. 45 جىلدان استام تۋعان جاڭاارقا اۋدانىندا تاباندى ەڭبەك ەتىپ كەلە جاتقان ازاماتتىڭ كاسىبي جولى – كوپكە ۇلگى.
«ۇزدىك مەملەكەتتىك قىزمەتشى» توسبەلگىسىنە
مەيرامكۇل وسپانوۆا يە بولدى. ەڭبەك ءوتىلى – 37 جىل. سوڭعى 25 جىلىن قاراجال قالاسىنىڭ جۇمىسپەن قامتۋ بولىمىندە وتكىزگەن.
سونداي-اق «ۇزدىك مەملەكەتتىك قىزمەتشى» توسبەلگىسى ارداق جاپاروۆقا تابىستالدى. جاس بولسا دا جاۋاپتى قىزمەتتەردى ابىرويمەن اتقارىپ جۇرگەن بىلىكتى ماماننىڭ بولاشاعىنان ۇلكەن ءۇمىت كۇتىلەدى.
سونىمەن قاتار، سالتاناتتى شارادا ۇلىتاۋ وبلىسىنىڭ قۇرمەت گراموتالارىمەن ماراپاتتالعان مەملەكەتتىك قىزمەتشىلەر دە ءوز سالاسىنىڭ ۇزدىك ماماندارى رەتىندە تانىلدى. ولاردىڭ ورتاشا ەڭبەك ءوتىلى – 25 جىلدان استام.
«ماراپات يەلەرىنىڭ ارقايسىسىنىڭ ءومىر جولى – كەلەر ۇرپاققا ۇلگى، ءبىز ءۇشىن ماقتانىش. سىزدەردىڭ وبلىسىمىزدىڭ دامۋىنا قوسقان ۇلەستەرىڭىز ەرەكشە»، – دەپ اتاپ ءوتتى وبلىس اكىمى.
