ۇلىتاۋ وبلىسىندا 2025 جىلى ينتەرنەت-الاياقتىق دەرەكتەرى 179%-عا ارتقان. اتاپ ايتقاندا، قىلمىس سانى 121-دەن 313-كە دەيىن ءوسىپ، سونىڭ سالدارىنان جابىرلەنۋشىلەرگە 500 ملن تەڭگەدەن استام ماتەريالدىق زالال كەلتىرىلگەن.
وسىعان بايلانىستى ۇلىتاۋ وبلىسىنىڭ پروكۋراتۋراسىمەن ينتەرنەت-الاياقتىقتىڭ الدىن الۋعا باعىتتالعان ۇيلەستىرۋ جانە پرەۆەنتيۆتىك شارالاردىڭ كەشەنى قابىلدانۋدا. بۇل رەتتە قۇقىق قورعاۋ ورگاندارىنىڭ، مەملەكەتتىك مەكەمەلەردىڭ، كاسىپورىنداردىڭ جانە بۇقارالىق اقپارات قۇرالدارىنىڭ ءوزارا ءىس-قيمىلىنا ەرەكشە ءمان بەرىلۋدە. نەگىزگى ماقسات – تۇرعىنداردىڭ قارجىلىق جانە قۇقىقتىق ساۋاتتىلىعىن ارتتىرۋ، الاياقتىق ارەكەتتەردىڭ كەڭ تارالعان تاسىلدەرى تۋرالى ۋاقتىلى اقپارات بەرۋ جانە وسىنداي قۇقىق بۇزۋشىلىقتاردىڭ الدىن الۋ.
ەرەكشە نازار حالىقپەن جانە ەڭبەك ۇجىمدارىمەن جۇرگىزىلەتىن پروفيلاكتيكالىق جۇمىسقا اۋدارىلۋدا. ءتيىمدى باعىتتاردىڭ ءبىرى – كاسىپورىن قىزمەتكەرلەرىمەن ءتۇسىندىرۋ كەزدەسۋلەرىن وتكىزۋ. اتاپ ايتقاندا، «قازاقمىس كورپوراتسياسى» جشس ۇجىمدارىمەن بەلسەندى جۇمىس جۇرگىزىلۋدە. وتكەن جىلى اۋقىمدى اقپاراتتىق-ءتۇسىندىرۋ ءىس-شارالارى ۇيىمداستىرىلىپ، اعىمداعى جىلى بۇل جۇمىس جۇيەلى تۇردە جالعاسۋدا.
وسى باعىتتاعى كەزەكتى ءتۇسىندىرۋ كەزدەسۋى وبلىس پروكۋراتۋراسىمەن ق.ي. ساتباەۆ اتىنداعى «جەزقازعان تاۋ-كەن ءوندىرىسى» قۇيۋ-مەحانيكالىق زاۋىتىنىڭ ەڭبەك ۇجىمىمەن ۇيىمداستىرىلدى. كەزدەسۋ بارىسىندا قىزمەتكەرلەرگە ينتەرنەت-الاياقتىقتىڭ كەڭ تارالعان سحەمالارى، ونىڭ ىشىندە بانك قىزمەتكەرى، پوليتسيا نەمەسە وزگە دە رەسمي ورگان وكىلى رەتىندە حابارلاسۋ، كۇماندى سىلتەمەلەر جولداۋ، جالعان نەسيە راسىمدەۋ، سونداي-اق جالعان ينۆەستيتسيالىق جوبالار مەن وڭاي تابىس تابۋعا شاقىراتىن الاياقتىق ۇسىنىستار تۋرالى جان-جاقتى ءتۇسىندىرىلدى.
سونىمەن قاتار ازاماتتارعا ينتەرنەت كەڭىستىگىندە جەكە دەرەكتەردى قورعاۋ، بەيتانىس ادامدارعا بانك كارتاسىنىڭ دەرەكتەرىن، SMS-كودتاردى جانە قۇپيا سوزدەردى بەرمەۋ، تەكسەرىلمەگەن قوسىمشالار مەن سىلتەمەلەرگە وتپەۋ، سونداي-اق كۇماندى قارجىلىق وپەراتسيالار كەزىندە دەرەۋ بانككە نەمەسە قۇقىق قورعاۋ ورگاندارىنا جۇگىنۋ قاجەتتىگى ەسكەرتىلدى.
كەزدەسۋ بارىسىندا ينتەرنەت-الاياقتاردىڭ ءجيى قولداناتىن پسيحولوگيالىق ىقپال ەتۋ تاسىلدەرى دە ءتۇسىندىرىلدى. اتاپ ايتقاندا، ازاماتتاردى اسىقتىرۋ، قورقىتۋ، جالعان اقپارات ارقىلى قىسىم كورسەتۋ، «شۇعىل شەشىم قابىلداۋ قاجەت» دەگەن اسەر قالىپتاستىرۋ سىندى ادىستەردىڭ قاۋىپتىلىگىنە نازار اۋدارىلدى.
قابىلدانعان شارالاردىڭ ناتيجەسىندە 2026 جىلدىڭ ءبىرىنشى توقسانىندا جاعدايدى تۇراقتاندىرۋعا قول جەتكىزىلدى: ينتەرنەت-الاياقتىق دەڭگەيى وتكەن جىلدىڭ وسى كەزەڭىمەن بىردەي دەڭگەيدە ساقتالدى — 41 فاكت.
بۇل باعىتتاعى جۇمىس الداعى ۋاقىتتا دا جالعاساتىن بولادى جانە حالىقتىڭ قۇقىقتىق ساۋاتتىلىعىن ارتتىرۋعا، ازاماتتاردىڭ ساقتىق مادەنيەتىن قالىپتاستىرۋعا، سونداي-اق ينتەرنەت-الاياقتىق سالاسىنداعى قىلمىس دەڭگەيىن تومەندەتۋگە باعىتتالادى.
