بەس اي بۇرىن ەلدەن كەتەتىنىن مالىمدەگەن تانىمال رەجيسسەر ەرمەك تۇرسىنوۆ قازاقستانعا قايتا ورالدى، دەپ حابارلايدى "ادىرنا" ۇلتتىق پورتالى Ertenmedia-عا سىلتەپ.
بۇل اقپاراتتى ونىڭ دوسى، ەكس-ساياساتكەر بولات ءابىلوۆ راستاعان.
بولات ءابىلوۆ ءوزىنىڭ الەۋمەتتىك جەلىدەگى جازباسىندا تۇرسىنوۆتىڭ ەلگە امان-ەسەن ورالعانىن قۋانا حابارلاعان. ونىڭ ايتۋىنشا، شەتەلدە شامامەن بەس اي جۇرگەن رەجيسسەرمەن اڭگىمە بارىسىندا ەلدەگى جانە الەمدەگى ساياسي-ەكونوميكالىق احۋال، قوعامداعى وزگەرىستەر ءسوز بولعان.
«قايدا قاراساڭ دا الاساپىران، شيەلەنىس، داعدارىس. وسىنداي كەزەڭدە دۇنيەگە دانالىق بيىگىنەن قاراۋ ماڭىزدى»، — دەپ جازدى ءابىلوۆ.
سونداي-اق ول ەرمەك تۇرسىنوۆتىڭ تۇلعالىق بولمىسىنا جوعارى باعا بەرىپ، ونىڭ قازاقستان اتىنان ءۇش رەت «وسكار» سىيلىعىنا ۇسىنىلعانىن ەسكە سالدى. وعان قازاقستاندا شىعارماشىلىقپەن اينالىسۋعا "وتتەگى" جەتپەگەن.
«ەركىن شىعارماشىلىقپەن اينالىسۋىما مۇمكىندىك قالمادى. ماعان بۇل ەلدە وتتەگى جەتپەيدى. ابسۋرد ادەپكى جاعدايعا اينالدى»، — دەگەن بولاتىن رەجيسسەر سول كەزدە.
مەديا مالىمەتىنشە، جۋرناليست گۇلبانۋ ابەنوۆا تۇرسىنوۆتىڭ ءسوزىن سىنعا الىپ، ونىڭ مەملەكەتتەن ەڭ كوپ قولداۋ كورگەن رەجيسسەرلەردىڭ ءبىرى ەكەنىن مالىمدەگەن.
«مەملەكەتتەن ميللياردتاعان تەڭگە العان. مىسالى، “بەسمويناق” فيلمىنە 500 ملن تەڭگە جۇمسالدى، بىراق ول ءالى كورەرمەنگە جەتكەن جوق»، — دەگەن ەدى ابەنوۆا.
Erten media ابەنوۆانىڭ سوزىنشە تۇرسىنوۆ پروديۋسەرلەر مەن ەسەپشىلەرگە قاتىستى تەرگەۋ باستالعان سوڭ، ەلدەن كەتۋدى ۇيعارعانىن دا جازدى.
مادەنيەت كوميتەتىنىڭ وكىلدەرى دە رەجيسسەر ەلدەن كەتەر الدىندا مەملەكەتتەن تاعى 20 ملرد تەڭگە سۇراعانىن حابارلاعان بولاتىن.
ەرمەك تۇرسىنوۆتىڭ بۇل جولعى ساپارىنىڭ ماقساتى مەن قازاقستاندا قانشا ۋاقىت بولاتىنى ازىرگە بەلگىسىز.
