كاسىپكەر اليكا مۇحاماديەۆاعا قاتىستى رەزونانستى ءىس سوتقا جەتتى. قازىبەك بي اۋداندىق سوتى قىلمىستىق ءىستى وندىرىسكە قابىلدادى، دەپ حابارلايدى "ادىرنا" ۇلتتىق پورتالى Orda.kz-كە سىلتەمە جاساپ.
العاشقى سوت وتىرىسى 2025 جىلدىڭ 14 قازانىنا بەلگىلەندى.
سوت قاۋلىسىنا سايكەس، تىڭداۋلار اشىق فورماتتا وتپەك. مۇحاماديەۆا سوت زالىنا كونۆويمەن جەتكىزىلەدى. تەرگەۋ بارىسىندا ول قاماۋدا بولعان.
كاسىپكەرگە قر قىلمىستىق كودەكسىنىڭ 174-بابىنىڭ 1-بولىگى بويىنشا – «الەۋمەتتىك، ۇلتتىق، رۋلىق، ناسىلدىك نەمەسە ءدىني الاۋىزدىقتى قوزدىرۋ» بابى بويىنشا ايىپ تاعىلعان.
قىلمىستىق ءىستىڭ قوزعالۋى ونىڭ Threads الەۋمەتتىك جەلىسىندە قازاقتار تۋرالى جازعان پىكىرلەرىمەن بايلانىستى. الەۋمەتتىك جەلى قولدانۋشىلارى مۇحاماديەۆانى ارانداتۋشىلىق جانە قورلاۋ سيپاتىنداعى جازبالار تاراتتى دەپ ايىپتاعان. كەيىن ول بەينەجازبا جاريالاپ، كوپشىلىك الدىندا كەشىرىم سۇراعانىمەن، بۇل ونى جاۋاپكەرشىلىكتەن بوساتپاعان.
اليكا مۇحاماديەۆا قاراعاندى قالاسىندا قىتايدان تاۋار جەتكىزۋ جانە كيىم دۇكەنىن يەلەنگەن كاسىپكەر رەتىندە بەلگىلى. ەگەر سوت ونىڭ كىناسىن دالەلدەسە، ول ەكى جىلدان جەتى جىلعا دەيىن باس بوستاندىعىنان شەكتەلۋى نەمەسە ايىرىلۋى مۇمكىن.
