باس پروكۋروردىڭ ورىنباسارى عالىمجان قويگەلديەۆ شەرزات پولاتتىڭ وتباسى ءۇيىنىڭ ورتكە ورانۋىنا قاتىستى تەرگەۋ جۇمىستارى جونىندە جاڭا مالىمەتتەرمەن ءبولىستى، دەپ حابارلايدى “ادىرنا” ۇلتتىق پورتالى.
قويگەلديەۆتىڭ ايتۋىنشا، اتالعان ىسكە قاتىستى سوتقا دەيىنگى تەرگەۋ جۇمىستارى ءالى دە جالعاسۋدا.
«بىرقاتار ساراپتامالار تاعايىندالىپ، ولاردىڭ ناتيجەلەرى الىندى. سونىمەن قاتار، رەسەي فەدەراتسياسىنا حالىقارالىق تەرگەۋ تاپسىرماسى جىبەرىلدى»، – دەدى ول سەناتتاعى بريفينگ بارىسىندا.
باس پروكۋروردىڭ ورىنباسارىنىڭ سوزىنشە، قۇقىق قورعاۋ ورگاندارى سەرىكتەس ەلدەردەن سپۋتنيكتىك سۋرەتتەر ارقىلى وقيعا بولعان كۇنى شەرزاتتىڭ ءۇيىنىڭ ماڭىندا قانداي كولىكتەر تۇرعانىن انىقتاۋعا تىرىسىپ جاتىر.
«بۇل – ءىستىڭ تولىقتىعى ءۇشىن قاجەت. سوندىقتان ۋاقىت كەرەك»، – دەپ ءتۇسىندىردى ول.
ەسكە سالا كەتەيىك، 2024 جىلعى 4 قازانعا قاراعان ءتۇنى تالعار قالاسىندا 16 جاستاعى شەرزات پولات دۇكەندە اكەسىنە كومەكتەسىپ جۇرگەندە، اگرەسسيۆتى ساتىپ الۋشىمەن قاقتىعىس بولىپ، ارتى جانتۇرشىگەرلىك قىلمىسقا ۇلاسقان. كۇدىكتىلەر شەرزات پەن ونىڭ تۋىستارىنا پىشاق جانە اڭشى مىلتىعىمەن شابۋىل جاساعان. وقيعا ورنىندا شەرزات قازا تاپتى.
كەيىن بۇل ءىستى ىشكى ىستەر ءمينيسترى ەرجان سادەنوۆ ءوز باقىلاۋىنا العان ەدى. جەتى كۇدىكتى ۇستالىپ، ولار ەكى اي مەرزىمگە قاماۋعا الىنعان.
قايعىلى وقيعادان كەيىن شەرزات پولاتتىڭ وتباسىنىڭ ءۇيى ورتەلىپ كەتكەن بولاتىن. قازىرگى ۋاقىتتا تەرگەۋ ورگاندارى بۇل قىلمىستىڭ بارلىق قىرىن انىقتاۋعا كۇش سالىپ جاتىر.
