بۇگىن تۇركىستان قالاسىنىڭ اكىمى ازىمبەك پازىلبەكۇلىنىڭ توراعالىعىمەن كەزەكتى اپپاراتتىق ءماجىلىس ءوتتى. جيىنعا قالا اكىمىنىڭ ورىنباسارلارى، ءبولىم باسشىلارى مەن سالالىق دەپارتامەنت باسشىلارى قاتىستى.
كۇن تارتىبىندە تۇرعىن ءۇي سالاسىنداعى وزەكتى ماسەلەلەردى شەشۋ، مەملەكەتتىك باعدارلامالاردىڭ ورىندالۋ بارىسى، كوپقاباتتى تۇرعىن ۇيلەردىڭ قۇرىلىس ساپاسى جانە 2025–2026 جىلعى قىسقى ماۋسىمعا دايىندىق جۇمىستارى قارالدى.
العاشقى ماسەلە بويىنشا تۇرعىن ءۇي قاتىناستارى جانە تۇرعىن ءۇي ينسپەكتسياسى ءبولىمىنىڭ باسشىسى تالعات مىرزابايۇلى بايانداما جاساپ، جالعا بەرىلەتىن جانە سۋبسيديامەن بولىنگەن پاتەرلەرگە قاتىستى جىل باسىنان بەرى جۇرگىزىلگەن تۇگەندەۋ جۇمىستارىنىڭ ناتيجەسى مەن جىلۋ ماۋسىمىندا پروبلەمالىق جاعداي ءجيى بولاتىن تۇرعىن ۇيلەردىڭ جاي-كۇيىن باياندادى.
وسىعان دەيىن، قالا اكىمىنىڭ تاپسىرماسىنا سايكەس 1 جانە 2 مولتەك اۋدانداردا جىلىتۋ قۇبىرلارىنىڭ ەسكىرۋىنە جانە جارامسىزدىعىنا بايلانىستى ارنايى جۇمىسشى توپ قۇرىلىپ، زەردەلەۋ جۇمىستارىنىڭ ناتيجەسىندە رەتكە كەلتىرۋدى تاپسىرعان بولاتىن.
ال جاڭا قالا شاعىن اۋدانىنداعى كوپقاباتتى 16 تۇرعىن ءۇيدىڭ جەرتولەلەرىنە كۇردەلى جوندەۋ، 25 پودەزگە اعىمداعى جوندەۋ، 8 شاتىرعا رەكونسترۋكتسيا، 5 ءليفتىنى اۋىستىرۋ جۇمىستارى جۇرگىزىلۋدە. بۇل تۋرالى قۇرىلىس ءبولىمىنىڭ باسشىسى نۇرسۇلتان ءمۇراتىلىۇلى كوپقاباتتى تۇرعىن ۇيلەردىڭ قۇرىلىس ساپاسى، ينجەنەرلىك جۇيەلەردىڭ اقاۋلارى، جانە تۇرعىنداردان ءجيى تۇسەتىن شاعىمدار تۋرالى بايانداماسىندا مالىمدەدى. قازىرگى تاڭدا تۇركىستان قالاسىندا مەملەكەت جانە جەكە ينۆەستيتسيا ەسەبىنەن 37 تۇرعىن ءۇيدىڭ قۇرىلىسى ءجۇرىپ جاتىر.
ازىمبەك پازىلبەكۇلى قۇرىلىس ساپاسىنا بايلانىستى ناقتى ەسكەرتۋلەر جاساپ، ءاربىر ءۇي بويىنشا تەحنيكالىق ساراپتاما جۇرگىزۋدى، انىقتالعان كەمشىلىكتەردى 1 اپتا ىشىندە جويۋدى تاپسىردى.
ءماجىلىستىڭ كۇن تارتىبىندەگى ءۇشىنشى ماسەلە بويىنشا «جىلۋ» مكك باسشىسى ەرعازى ابدۋراحمانۇلى 2025-2026 جىلعى جىلۋ ماۋسىمىنا دايىندىق بارىسىن باياندادى. قالادا جالپى 17 قازاندىق پەن 77 قازان، 56,243 شاقىرىمدىق جىلۋ جۇيەسى بار. دەگەنمەن، تۇرعىندار مەن زاڭدى تۇلعالار تاراپىنان مەكەمەگە 86 ملن تەڭگە بەرەشەك بار. ونىڭ ىشىندە 77 ملن – زاڭدى تۇلعالاردان، 9 ملن – جەكە تۇلعالاردان. قالا باسشىسى جىلۋ جۇيەلەرىنىڭ قاۋىپتى ۋچاسكەلەرىن كارتا تۇرىندە جاساپ، جاڭعىرتۋ جوسپارىن ۇسىنۋدى، سونداي-اق، توتەنشە جاعدايلار كەزىندە جەدەل ارەكەت ەتۋ الگوريتمىن ازىرلەۋدى، گەنەراتورلارمەن قامتاماسىز ەتۋدى جانە اپاتتىق بريگادالاردىڭ تاۋلىك بويى كەزەكشىلىگىن ۇيىمداستىرۋدى تاپسىردى.
جيىن سوڭىندا قالا اكىمى بارلىق سالا باسشىلارىنا بەرىلگەن تاپسىرمالاردىڭ زاڭ اياسىندا جانە بەلگىلەنگەن مەرزىمدە ورىندالۋىن قاتاڭ باقىلاۋدى جۇكتەدى.
ۇقساس جاڭالىقتار
