قازاقستان رەسپۋبليكاسىنىڭ وقۋ-اعارتۋ ءمينيسترى قىزمەتىن اتقارعان عاني بەيسەمباەۆ قىزمەتىنەن بوساتىلعان سوڭ جەلىدە جازبا جاريالادى، دەپ حابارلايدى "ادىرنا" ۇلتتىق پورتالى.
ەكس-مينيستر مەملەكەت باسشىسىنا سەنىم بىلدىرگەنى ءۇشىن العىس ايتىپ، ۇستازدار قاۋىمىنا ريزاشىلىعىن جەتكىزدى. ونىڭ سوزىنشە، سوڭعى جىلدارى ءبىلىم بەرۋ سالاسىندا بىرقاتار ماڭىزدى باستامالار جۇزەگە اسقان.
"پرەزيدەنتىمىزدىڭ تىكەلەي قولداۋىنىڭ ارقاسىندا پەداگوگتەردىڭ ەڭبەكاقىسى ەكى ەسە كوتەرىلىپ، «پەداگوگ مارتەبەسى تۋرالى» زاڭ قابىلدانىپ، ەكى جىلدا ءۇش ۇستازعا «ەڭبەك ەرى» اتاعى بەرىلىپ، «كەلەشەك مەكتەپتەرى» جوباسى قولعا الىنعانى بەلگىلى.
وسى جىلدار ىشىندە جاڭا مەكتەپتەر سالۋمەن قاتار، مۇعالىم مارتەبەسى ارتىپ، بالالاردىڭ قاۋىپسىزدىگى كۇشەيىپ، زاماناۋي باعدارلامالار ازىرلەنىپ، ينكليۋزيۆتى ءارى تەڭ ءبىلىم بەرۋگە ۇلكەن قادامدار جاسالدى. سونداي-اق العاش رەت مەكتەپتەگى بالا تاربيەسىنە اسا ءمان بەرىپ بىرىڭعاي تاسىلدەرى بەكىتىلدى. بۇل جەتىستىكتەر پرەزيدەنتتىڭ تىكەلەي پارمەنى مەن 600 مىڭ پەداگوگتىڭ ۇزدىكسىز توككەن مانداي تەرىنىڭ جەمىسى، بىرلەسە اتقارعان ورتاق جۇمىستىڭ جەڭىسى.
سول ءۇشىن دە ەلىمىزدىڭ بارلىق پەداگوگتەرى مەن ارداگەر-ۇستازدارعا سەنىم مەن قولداۋ بىلدىرگەندەرىڭىز ءۇشىن شەكسىز ريزاشىلىعىمدى بىلدىرەمىن. تاباندىلىقپەن اتقارعان ادال ەڭبەكتەرىڭىز ىسىمىزگە قۋات بەرىپ، شابىت سىيلاپ وتىردى. سوندىقتان دا ءبىز قابىلداعان ءار شەشىم ءبىلىم بەرۋ ۇيىمدارىندا جايلى ءارى قاۋىپسىز ورتا قالىپتاستىرىپ، مۇعالىم قىزمەتىنىڭ مارتەبەسى مەن ماڭىزىن ارتتىرا ءتۇستى.
وسى ورايدا پرەزيدەنت اكىمشىلىگىنە، پارلامەنت پەن ۇكىمەت اپپاراتىنا، سونداي-اق مينيسترلەر مەن ءوڭىر اكىمدەرىنە بالالارىمىزدىڭ قاۋىپسىزدىگى مەن دەنساۋلىعىنا قاتىستى ەڭ جاۋاپتى ماسەلەلەردى شەشۋدە قولداۋ كورسەتكەندەرىنە ايرىقشا العىسىمدى بىلدىرەمىن", - دەدى ەكس-مينيستر.
بەيسەمباەۆ جاڭا مەكتەپتەردىڭ سالىنعانىن، مۇعالىم مارتەبەسىنىڭ ارتقانىن، بالالاردىڭ قاۋىپسىزدىگى كۇشەيگەنىن، زاماناۋي باعدارلامالاردىڭ ازىرلەنگەنىن اتاپ ءوتتى.
"سونىمەن قاتار، قر وقۋ-اعارتۋ مينيسترلىگىنىڭ، ۆەدومستۆولىق باعىنىستى ۇيىمداردىڭ، ايماقتىق ءبىلىم باسقارمالارى مەن بولىمدەردىڭ، وبلىستىق ادىستەمەلىك جانە پسيحولوگيالىق ورتالىقتاردىڭ، بالاباقشالار مەن مەكتەپتەردىڭ، كوللەدجدەردىڭ قىزمەتكەرلەرىنە العىس ايتامىن.
جاڭالىقتاردىڭ جارشىسى باق وكىلدەرىنە ءبىلىم سالاسىنىڭ وتكىر ماسەلەلەرىن كوتەرىپ، ءتيىمدى شەشىمدى قابىلداۋعا ىقپال ەتكەندەرى ءۇشىن مىڭ العىس.
وسى ۋاقىت ىشىندە مۇعالىم مەن مەكتەپتىڭ سەنىمدى سەرىگىنە اينالعان اتا-انالار مەن ۇكىمەتتىك ەمەس ۇيىمدارىنا شىن جۇرەكتەن ريزاشىلىعىمدى بىلدىرەمىن. مۇنداي ارىپتەستىك بايلانىس مەكتەپتەگى بالانىڭ مىقتى تۇلعا بولىپ قالىپتاسۋىنا كوپ كومەگىن تيگىزگەنى راس. بۇل قارەكەتتىڭ ءداستۇرلى جالعاسىن تاباتىنىنا سەنەمىن", - دەپ جازدى ول.
ءوز جازباسىندا ول بارلىق پەداگوگتەرگە، ارداگەر ۇستازدارعا، مينيسترلىك پەن ايماقتىق ءبىلىم باسقارمالارىنىڭ قىزمەتكەرلەرىنە، باق وكىلدەرىنە، اتا-انالار مەن ۇكىمەتتىك ەمەس ۇيىمدارعا قولداۋ كورسەتكەنى ءۇشىن العىس ءبىلدىردى.
«تاربيە مەن ءبىلىم بەرۋدەگى ەڭ باستى تۇلعا – بالا بولسا، وعان قىزمەت ەتۋ ءبىزدىڭ باستى مۇراتىمىز»، – دەپ قورىتىندىلادى عاني بەيسەمباەۆ.
