قر وقۋ-اعارتۋ ەكس-ءمينيسترى اسحات ايماعامبەتوۆ نارتاي ارالبايۇلىنا بەرگەن سۇحباتىندا استاناداعى ۋنيۆەرسيتەتتىڭ بىرىنە قاراپايىم وقىتۋشى بولىپ جۇمىسقا ورنالاسىپ جاتقانىن حابارلادى، دەپ جازادى "ادىرنا" ۇلتتىق پورتالى.
"قازىر مەن ۇيدەمىن. قولىم بوس. نەگىزىنەن سول بالالاردى تاڭەرتەن مەكتەپكە، بالاباقشاعا اپارىپ، سودان كەيىن بالاباقشادان، مەكتەپتەن الىپ كەتىپ ءجۇرمىن. 4 قاڭتاردا جۇمىستان كەتكەننەن كەيىن ءدال سول كۇنى كەشكە جاقىن بالاباقشاعا باردىم. كىشى ۇلدى الىپ كەتۋ كەرەك بولدى. سوندا بالاباقشاداعى اپايى بارىپ "ۇيگە الىپ كەتۋگە اكەڭ كەلدى" دەپ ايتىپ جاتىر. سوندا ار جاقتان ەستىپ جاتىرمىن... "جوق، اكە ەمەس. انام شىعار" دەپ سەنبەدى. قالاي كەلدى دەپ ول دا تاڭعالىپ جاتىر عوي... ەندى ۇيدە جينالىپ قالعان تۇرمىستىق ءار ءتۇرلى شارۋالار بار. كىتاپ وقۋعا ۋاقىت پايدا بولدى. وزىمە ۇنايدى. سونداي ۋاقىت قازىر...", - دەدى ايماعامبەتوۆ.
ەكس مينيستر استاناداعى ۋنيۆەرسيتەتتىڭ بىرىنە قاراپايىم وقىتۋشى بولىپ جۇمىسقا ورنالاسىپ جاتقانىن حابارلادى.
"وسى جۋىردا ماعان استانا قالاسىنداعى وتە ءىرى، ساپالى ۋنيۆەرسيتەتتەردىڭ ءبىرى ء"بىراز تاجىريبەڭىز بار. وسى تاجىريبەمەن ستۋدەنتتەرمەن بولىسسەڭىز" دەپ ۇسىنىس بەردى. ەندى مەن ءوزىم وقىتۋشى، پەداگوگ بولعاننان كەيىن ماعان ۇستاز بولۋ وتە جاقىن. سوندىقتان كادىمگىدەي قاراپايىم وقىتۋشى بولىپ، ستۋدەنتتەرمەن جۇمىس ىستەۋ دەگەن ۇسىنىستى قابىلدادىم. ەندى قازىرگى ۋاقىتتا ءتيىستى قۇجاتتاردى، كۋرس باعدارلاماسىن، سيلابۋس دەگەن سياقتى باسقا جۇمىستارمەن قازىر اينالىسىپ جاتىرمىن. باسقا دا ءار ءتۇرلى ۇسىنىستار بار. مەن جاسىرمايمىن. بۇل ۇسىنىستار بويىنشا شەشىم قابىلداپ، ول تۋرالى اقپاراتتى جاقىندا قوعامعا جەتكىزەمىن. اعارتۋشىلىق جۇمىسپەن اينالىسۋ، بالالارعا ءبىلىم بەرۋ، جيناعان تاجىريبەمەن ءبولىسۋدى قايدا جۇرسەڭ دە، ونى بىرگە الىپ جۇرۋگە بولادى. قانداي قىزمەتكە بارساڭ دا، نەمەن اينالىسساڭ دا، بىرگە الىپ جۇرەتىن جۇمىس. سوندىقتان قازىرگى ۋاقىتتا قاراپايىم وقىتۋشى رەتىندە ءوزىم وسىنداي وسكەلەڭ ۇرپاقپەن تاجىريبەمدى ءبولىسۋدى ءجون كورىپ وتىرمىن", - دەپ مالىمدەدى اسحات ايماعامبەتوۆ.
"ادىرنا" ۇلتتىق پورتالى
