بەلگىلى عالىم، قايراتكەر، ۇستاز سەرىك پىراليەۆ ومىردەن وزدى. قازاقستان عىلىمىنداعى ورنى تولمىس قازا جايلى قازاقستان رەسپۋبليكاسى عىلىم جانە جوعارى ءبىلىم ءمينيسترى ساياسات نۇربەك حابارلاپ، بارشا شاكىرتتەرىنە كوڭىل ايتتى، دەپ جازدى "ادىرنا" ۇلتتىق پورتالى.
"بۇكىل سانالى عۇمىرىن حالىققا ءبىلىم بەرۋ ىسىنە ارناعان ابزال ازامات سەرىك جايلاۋۇلىنىڭ ومىردەن وتۋىنە بايلانىستى ورنى تولماس اۋىر قايعىعا ورتاقتاقتاسىپ كوڭىل ايتامىن.پەداگوگيكا عىلىمدارىنىڭ دوكتورى، پروفەسسور، قر ۇلتتىق عىلىم اكادەمياسىنىڭ اكادەميگى سەرىك جايلاۋۇلى پىراليەۆ ۇزاق جىلدار بويى ەلىمىزدىڭ جەتەكشى ۋنيۆەرسيتەتتەرىندە، قر ءبىلىم جانە عىلىم مينيسترلىگىندە باسشىلىق قىزمەتتەر اتقارىپ، سالانىڭ دامۋىنا زور ەڭبەك ءسىڭىردى. تالانتتى شاكىرتتەر باۋلىعان ۇلاعاتتى ۇستاز، ەل ىسىنە ەتەنە ارالاسقان كورنەكتى مەملەكەت جانە قوعام قايراتكەرى بولدى. وتاندىق عىلىمنىڭ قارقىندى دامۋىنا ايرىقشا ۇلەس قوستى. سونىمەن قاتار قوعامدىق ىستەرگە دە اتسالىسىپ، جۇرتشىلىقتىڭ ىزەت-ءىلتيپاتى مەن قۇرمەتىنە بولەندى. جەمىستى قىزمەتى جوعارى ماراپاتتارمەن اتاپ ءوتىلدى.ارداقتى اعامىزدىڭ ونەگەلى ءومىر جولى ۇرپاقتان-ۇرپاققا ۇلگى بولىپ، اقجارقىن اسىل بەينەسى بارشا جاقىندارىنىڭ جۇرەگىندە ماڭگى قالارى ءسوزسىز. عالىمنىڭ عۇمىر جولى وسكەلەڭ ۇرپاققا ءاردايىم ۇلگى بولىپ قالا بەرەتىنى انىق.مارقۇمنىڭ جاتقان جەرى جايلى، توپىراعى تورقا بولسىن!" - دەپ كۇڭىرەندى مينيستر.
سەرىك جايلاۋۇلى پىراليەۆ 1952 جىلى تۇركىستان وبلىسى، تۇلكىباس اۋدانى، اقبيىك اۋىلىندا تۋعان. ول پەداگوگيكا عىلىمىنىڭ دوكتورى، پروفەسسور. قازاقستان رەسپۋبليكاسىنىڭ ۇلتتىق عىلىم اكادەمياسىنىڭ قۇرمەتتى مۇشەسى. قازاقستان ءبىلىم بەرۋ ءىسىنىڭ ۇزدىگى، ى.التىنسارين اتىنداعى مەملەكەتتىك سىيلىقتىڭ يەگەرى.
"ادىرنا" ۇجىمى عالىم، ۇستاز، قايراتكەردىڭ بارشا ارىپتەستەرى مەن ۇزەڭگىلەستەرىنە، شاكىرتتەرى مەن تۋعان-تۋىسقاندارىنا قايعىرا وتىرىپ كوڭىل ايتادى.
"ادىرنا" ۇلتتىق پورتالى
