بيىلعى جىلعى 8 قىركۇيەكتە مەملەكەت باسشىسى قاسىم-جومارت توقاەۆ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى جولداۋىندا سۋدىڭ ماڭىزدىلىعىنا ەرەكشە توقتالىپ: «سۋ — ستراتەگيالىق ماڭىزى بار رەسۋرس، سۋسىز ءومىر جوق. سوندىقتان بۇل سالا ۇلتتىق تسيفرلىق جاڭعىرۋ جۇمىسىنداعى باستى باعىتتىڭ ءبىرى بولۋعا ءتيىس»، – دەپ اتاپ ءوتتى.پرەزيدەنتتىڭ وسى تاپسىرماسىنا سايكەس ەلىمىزدىڭ بارلىق وڭىرلەرىندە سۋ رەسۋرستارىن ۇتىمدى پايدالانۋ، سۋ جۇيەلەرىن جاڭارتۋ جانە تسيفرلاندىرۋ باعىتىندا جۇيەلى جۇمىستار جۇرگىزىلۋدە. بۇل رەتتە باتىس قازاقستان وبلىسى دا قارقىندى ارەكەت ەتۋدە. «كازسۋشار» رمك بقو فيليالى مالىمەتىنشە نىساندار جاڭارتىلىپ، اۆتوماتتاندىرىلعان جۇيەلەر ەنگىزىلۋدە.
قازىرگى ۋاقىتتا وڭىردە 50 جىلدان استام ۋاقىت بويى پايدالانىلىپ كەلگەن ءۇش سۋ قويماسى مەن جالپى ۇزىندىعى 436 شاقىرىمدى قۇرايتىن جەتى ماگيسترالدىق كانالدى قايتا جاڭعىرتۋ ءۇشىن جوبالىق-سمەتالىق قۇجاتتاما دايىندالۋدا. بۇل نىسانداردا سۋدى ەسەپكە الۋ مەن گيدروتەحنيكالىق يماراتتاردى باسقارۋدىڭ اۆتوماتتاندىرىلعان جۇيەلەرىن ەنگىزۋ كوزدەلگەن.
سونىمەن قاتار، كيروۆ سۋ قويماسىن قايتا جاڭعىرتۋ، كوشىم ماگيسترالدىق كانالى مەن شاعان وزەنى تارماعىن مەحانيكالاندىرىلعان تازارتۋ، سونداي-اق جاڭادان باستالاتىن جانىبەك سۋلاندىرۋ جۇيەسىنە كىرەتىن 192 شاقىرىم ارنانى قالپىنا كەلتىرۋ جوبالارىندا دا اۆتوماتتاندىرۋ ەلەمەنتتەرى قاراستىرىلىپ وتىر.
اعىمداعى جوندەۋ جۇمىستارى مەن ارنالاردى تازارتۋ جالعاسۋدا
سۋ شارۋاشىلىعى ينفراقۇرىلىمىنىڭ ءتيىمدى جۇمىسىن قامتاماسىز ەتۋ ءۇشىن جىل سايىنعى اعىمداعى جوندەۋ جانە مەحانيكالىق تازارتۋ جۇمىستارىنا ەرەكشە كوڭىل بولىنۋدە.
2024 جىلى ءوڭىر بويىنشا 13 سۋ نىسانىنا اعىمداعى جوندەۋ جۇرگىزىلىپ، 74 شاقىرىم كانال ءىشىنارا مەحانيكالىق تازارتىلدى. ال 2025 جىلعا ارنالعان جوسپار اياسىندا 26 نىساندا جوندەۋ جۇمىستارىن جۇرگىزۋ جانە 144 شاقىرىم ارنانى تازارتۋ كوزدەلگەن. بۇگىندە بۇل جوسپاردىڭ جارتىسىنان استامى ورىندالىپ، 11 نىسان جوندەلىپ، 100 شاقىرىمنان استام كانال تازارتىلدى. قالعان بولىگىن اياقتاۋ بويىنشا جۇمىستار جالعاسۋدا.بۇل شارالار سۋ شىعىنىن ازايتىپ قانا قويماي، اۋىل شارۋاشىلىعىن تۇراقتى سۋمەن قامتۋعا، ەكولوگيالىق تەپە-تەڭدىكتى ساقتاۋعا ىقپال ەتەدى.
جاڭا سۋ قويماسى سالىنىپ، كانالدار جاڭعىرتىلادى
يسلام دامۋ بانكى قارجىلاندىرۋىمەن كولەمى 28 ملن تەكشە مەتر بولاتىن جاڭا سۋ قويماسى كازتالوۆ اۋدانىنىڭ جالپاقتال اۋىلىنان جوعارى سالىنباق. سونداي-اق تاسقالا اۋدانىنداعى جايىقباي سۋلاندىرۋ كانالى قايتا جاڭعىرتىلادى. بۇل جوبالار اۋىل شارۋاشىلىعى القاپتارىنىڭ سۋعا قولجەتىمدىلىگىن ارتتىرىپ، ايماقتىڭ اگرارلىق الەۋەتىن كوتەرۋگە باعىتتالعان.
ماتەريالدىق-تەحنيكالىق بازا جاڭارتىلۋدا
سۋ رەسۋرستارى مينيسترلىگىنىڭ قولداۋىمەن فيليالدىڭ تەحنيكا پاركى دە كەزەڭ-كەزەڭىمەن جاڭارتىلىپ جاتىر. 2024–2025 جىلدارى 67 بىرلىك ارنايى تەحنيكا ساتىپ الۋ جوسپارلانعان. قازىرگى تاڭدا ونىڭ 51-ءى جەتكىزىلدى. بۇل تەحنيكالار فيليال قىزمەتكەرلەرىمەن بىرگە سۋ شارۋاشىلىعى نىساندارىن قالپىنا كەلتىرۋ جۇمىستارىنىڭ ءتيىمدى ءارى ساپالى جۇرگىزىلۋىن قامتاماسىز ەتەدى.
سۋارمالاۋ جۇيەلەرىن بىرىكتىرىلگەن باسقارۋعا كوشىرۋ
وبلىس اكىمىنىڭ تاپسىرماسىنا سايكەس، سۋارمالاۋ جۇيەلەرىن بىرىڭعاي باسقارۋ جۇيەسىنە كەلتىرۋ ماقساتىندا جايىق-كوشىم جانە جانىبەك سۋارمالاۋ جۇيەلەرىنە تيەسىلى 826 شاقىرىم ارنا مەن 57 مىڭ گەكتار كولدەتە سۋارمالاۋ الاپتارى كوممۋنالدىق مەنشىكتەن رەسپۋبليكالىق مەنشىككە بەرىلىپ جاتىر. بۇل جۇمىس 2025 جىلدىڭ سوڭىنا دەيىن تولىق اياقتالادى دەپ كۇتىلۋدە. ناتيجەسىندە سۋ جۇيەلەرىن قالپىنا كەلتىرۋ مەن دامىتۋ بويىنشا ناقتى تەحنيكالىق جانە قارجىلىق شەشىمدەر قابىلداناتىن بولادى.
كەشەندى جوسپار – ناقتى ارەكەت
سۋ سالاسىن جۇيەلى تۇردە دامىتۋ ءۇشىن 2024–2028 جىلدارعا ارنالعان سۋ شارۋاشىلىعىن دامىتۋدىڭ كەشەندى جوسپارى ازىرلەنىپ، وبلىس بويىنشا 127 ءىس-شارا ەنگىزىلدى. بۇل جوسپار ءوڭىردىڭ سۋ قاۋىپسىزدىگىن قامتاماسىز ەتىپ، اگروونەركاسىپتىك سەكتوردىڭ تۇراقتى دامۋىنا جول اشادى.
ۇلتتىق قاۋىپسىزدىكتىڭ كەپىلى – سەنىمدى سۋ جۇيەسى
پرەزيدەنت قاسىم-جومارت توقاەۆ اتاپ وتكەندەي: «سۋ ماسەلەسىن شەشۋ – الەۋمەتتىك تۇراقتىلىقتى ساقتاپ، ەكونوميكانى دامىتۋدىڭ كەپىلى. بۇل – ۇلتتىق قاۋىپسىزدىكتى قامتاماسىز ەتەتىن باستى فاكتوردىڭ ءبىرى».
وسىعان وراي، باتىس قازاقستاندا سۋ رەسۋرستارىن ءتيىمدى ءارى زاماناۋي تەحنولوگيالارمەن باسقارۋ بويىنشا كەشەندى جۇمىستار جالعاسا بەرمەك. بۇل تەك ەكونوميكالىق دامۋ ءۇشىن ەمەس، ءوڭىردىڭ بولاشاعى ءۇشىن دە اسا ماڭىزدى شارۋالاردىڭ ءبىرى.
