بۇگىن ۇلىتاۋ وبلىسىندا قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى، تاۋەلسىز «تارلان» سىيلىعىنىڭ لاۋرەاتى، كورنەكتى قازاق رەجيسسەرى جانات حادجيەۆ اتىنداعى حالىقارالىق تەاترلار فەستيۆالىنىڭ اشىلۋ سالتاناتى ءوتتى.
فەستيۆالدىڭ قۇرمەتتى قوناعى – قازاقستاننىڭ حالىق ءارتيسى، مەملەكەتتىك سىيلىقتىڭ لاۋرەاتى تۇڭعىشباي جامانقۇلوۆ، سونداي-اق جانات حادجيەۆتىڭ جۇبايى راشيدا حانىم بولدى.
بۇل – سەركە قوجامقۇلوۆ اتىنداعى قازاق مۋزىكالىق-دراما تەاترىنىڭ باستاماسىمەن ءتورتىنشى رەت ۇيىمداستىرىلىپ وتىرعان ونەر مەرەكەسى.
سالتاناتتى اشىلۋ راسىمىندە ءسوز سويلەگەن ۇلىتاۋ وبلىسىنىڭ اكىمى داستان رىسپەكوۆ قوناقتار مەن قاتىسۋشىلاردى قۇتتىقتاپ، فەستيۆالدىڭ ءوڭىردىڭ مادەني ومىرىندەگى ماڭىزدىلىعىن اتاپ ءوتتى.
– ۇلىتاۋ – ۇلتىمىزدىڭ التىن بەسىگى. وسى قاسيەتتى مەكەندە ءوتىپ جاتقان ونەر مەرەكەسى شىعارماشىلىق ىنتىماقتاستىقتى نىعايتىپ، ۇلتتىق ونەرىمىزدىڭ ءورىسىن كەڭەيتەدى دەپ سەنەمىن. فەستيۆالگە قاتىسۋشىلارعا تابىس، ال كورەرمەندەرگە جارقىن اسەر تىلەيمىن، – دەدى ايماق باسشىسى.
جانات حادجيەۆ اتىنداعى حالىقارالىق تەاترلار فەستيۆالى 16 قىركۇيەككە دەيىن جالعاسادى. وسى كۇندەرى ەلىمىزدىڭ بىرقاتار تەاترلارى مەن رەسەي، قىرعىزستان ەلدەرىنىڭ ونەر ۇجىمدارى ءوز قويىلىمدارىن ۇسىنىپ، باق سىنايدى.
