ۇلىتاۋ وبلىسىندا رەسپۋبليكالىق «تازا قازاقستان» ەكولوگيالىق اكتسياسىنىڭ جاڭا كەزەڭىنە باستاۋ بەرەتىن اۋقىمدى ءىس-شارا ۇيىمداستىرىلدى. اكتسيا اياسىندا «تازا ولكە – تازا جەر» باستاماسى جۇزەگە اسىرىلىپ، ونىڭ نەگىزگى ماقساتى – ەكولوگيالىق مادەنيەتتى قالىپتاستىرۋ، قورشاعان ورتاعا دەگەن جاۋاپكەرشىلىكتى ارتتىرۋ جانە تۇرعىنداردى اباتتاندىرۋ جۇمىستارىنا كەڭىنەن تارتۋ.
ءىس-شارا بارىسىندا جەزقازعان قالاسىنىڭ جاستارى مەن ەكو-ۆولونتەرلارى قالا كوشەلەرىن تازارتۋ جۇمىستارىنا بەلسەندى قاتىستى.
ۇلىتاۋ وبلىسىندا «تازا قازاقستان» تۇجىرىمداماسىن ىسكە اسىرۋ جۇيەلى تۇردە جۇرگىزىلۋدە. 2029 جىلعا دەيىنگى ءىس-قيمىل جوسپارىنا سايكەس وڭىردە 43 ءىس-شارا قاراستىرىلعان. 2025 جىلعا جوسپارلانعان 34 ءىس-شارانىڭ 32-ءسى ورىندالىپ، 2-ءۋى وتپەلى رەتىندە جالعاسۋدا. ونىڭ ىشىندە حالىق كوپ جينالاتىن ورىنداردا ەكوبوكستار مەن فاندوماتتار ورناتۋ، سونداي-اق بيزنەستىڭ الەۋمەتتىك جاۋاپكەرشىلىگى بويىنشا «پارىز» كونكۋرسىن «ەكولوگياعا قوسقان ۇلەسى ءۇشىن» نوميناتسياسىندا وتكىزۋ كوزدەلگەن.
2025 جىلى وڭىردە 13 وبلىستىق جانە 17 قالالىق سەنبىلىك ۇيىمداستىرىلدى. سونىمەن قاتار «تازا بەيسەنبى» اكتسياسى تۇراقتى تۇردە وتكىزىلۋدە. جالپى اباتتاندىرۋ جۇمىستارىنا 87 مىڭعا جۋىق ادام قاتىسىپ، 1423 بىرلىك ارنايى تەحنيكا جۇمىلدىرىلدى. ناتيجەسىندە 8 مىڭ توننادان استام قوقىس شىعارىلىپ، 27 مىڭنان استام اعاش كوشەتى وتىرعىزىلدى.
بۇدان بولەك، وڭىردە «تازا جاعالاۋ»، «تازا ايماق»، ء«مولدىر بۇلاق»، «تۋعان جەر – التىن بەسىگىم»، «جەر ساعاتى»، «تازا قالا»، «ۇلگىلى اۋىل» سىندى ەكولوگيالىق باستامالار ىسكە اسىرىلىپ، «ProEko» ەكولوگيالىق جوبالار بايقاۋى مەن «تابيعاتتى ايالا» اتتى جاس ولكەتانۋشىلار، ەكولوگتار جانە ناتۋراليستەر فورۋمى وتكىزىلدى.
2026 جىلعا ارنالعان جوسپارعا سايكەس 34 ءىس-شارا قاراستىرىلعان، ونىڭ ىشىندە بۇگىنگى كۇنگە دەيىن 3 ءىس-شارا جۇزەگە اسىرىلدى. بارلىق جۇمىستاردىڭ ورىندالۋى اي سايىنعى مونيتورينگ ارقىلى باقىلاۋدا. بۇل ولاردىڭ ساپالى ءارى ۋاقىتىلى جۇزەگە اسۋىن قامتاماسىز ەتەدى.
اتالعان ءىس-شارالاردىڭ نەگىزگى ماقساتى – جاس ۇرپاقتىڭ ەكولوگيالىق ساناسىن قالىپتاستىرۋ جانە قورشاعان ورتانى قورعاۋعا دەگەن جەكە جاۋاپكەرشىلىكتى ارتتىرۋ.
ەكولوگيالىق اكتسيا «تازا قازاقستان» ءوڭىر تۇرعىندارىن بىرىكتىرىپ، تابيعاتقا جاناشىرلىقپەن قاراۋ مادەنيەتىن قالىپتاستىرىپ، حالىقتىڭ ءومىر ءسۇرۋ ساپاسىن ارتتىرۋعا ۇلەس قوسۋدا.
