بۇگىن ۇلىستىڭ ۇلى كۇنى – ءاز ناۋرىز مەرەكەسىنە وراي ۇلىتاۋ وبلىسىنىڭ قالا-اۋداندارىندا اۋقىمدى ءارى مازمۇندى ءىس-شارالار ۇيىمداستىرىلدى. ءوڭىر بويىنشا بارلىعى 130 كيىز ءۇي تىگىلىپ، مەرەكەلىك دۋمانعا 100 مىڭنان استام تۇرعىن مەن قوناق جينالدى.
ايماق باسشىسى داستان رىسپەكوۆ وبلىس ورتالىعى – جەزقازعان قالاسىنداعى ناۋرىز مەرەكەسىنە قاتىسىپ، ءوڭىر جۇرتشىلىعىن ۇلىق مەرەكەمەن قۇتتىقتادى. وبلىس ورتالىعىندا 30-عا جۋىق كيىز ءۇي بوي كوتەرىپ، ولاردىڭ اراسىندا «ۇزدىك كيىز ءۇي» بايقاۋى ۇيىمداستىرىلدى. جەڭىمپازدار قوماقتى اقشالاي سىيلىقتارمەن ماراپاتتالىپ، بارلىق قاتىسۋشىلارعا ىنتالاندىرۋ سەرتيفيكاتتارى تابىستالدى. جەزقازعاننىڭ وزىندە 40 مىڭنان استام ادام مەرەكەلىك شارالاردى تاماشالادى.
مەرەكە بارىسىندا جينالعان قاۋىمعا ناۋرىز كوجە ۇسىنىلىپ، ۇلتتىق تاعامدار مەن سۋسىنداردان ءدام تاتقاندار ەرەكشە كوڭىل كۇيگە بولەندى.
سونىمەن قاتار، مەكەمەلەر مەن كاسىپورىندار اراسىندا ۇلتتىق سالت-داستۇرلەردى دارىپتەيتىن سايىستار ۇيىمداستىرىلىپ، كوپشىلىككە رۋحاني تاعىلىم سىيلادى.
ەتنواۋىل اۋماعىندا زاماناۋي تەحنولوگيالار دا كورىنىس تاپتى. اتاپ ايتقاندا، جاساندى ينتەللەكت نەگىزىندە ازىرلەنگەن Digital Nauryz روبوت ەكسپوزيتسيالارى كەلۋشىلەردىڭ قىزىعۋشىلىعىن ارتتىرىپ، مەرەكەگە ەرەكشە رەڭك بەردى.
مەرەكەلىك شارالار اياسىندا كەلۋشىلەرگە تايجان قالماعامبەتوۆ اتىنداعى وبلىستىق فيلارمونيا ونەرپازدارى مەن قازاقستان ەستراداسىنىڭ تانىمال جۇلدىزدارىنىڭ كونتسەرتتىك باعدارلاماسى ۇسىنىلدى.
