"Z" ۇرپاقتى الەۋمەتتىك جەلىدەن ايىرۋ كىشكەنتاي ءسابيدى ەمىزىكتەن ايىرعانمەن بىردەي. ءبىز كەشە مەملەكەت باسشىسىنىڭ جولداۋىن كورىپ، ارتىنان تالقىلاپ جاتقاندا نەپالدا جاستار كوشەدە دۇرلىگىپ جاتتى...
XXI عاسىردا الەۋمەتتىك جەلىلەر ادام ءومىرىنىڭ اجىراماس بولىگىنە اينالدى. ولار تەك قانا قارىم-قاتىناس قۇرالى ەمەس، وي ەركىندىگىن ءبىلدىرۋدىڭ، بيلىككە ءۇن قاتۋدىڭ، قوعامداعى وزگەرىستەرگە ىقپال ەتۋدىڭ الاڭى بولىپ وتىر.
نەپال ۇكىمەتىنىڭ 26 الەۋمەتتىك جەلىنى بۇعاتتاۋىنا قارسى جاستار كوتەرىلىسى – مۇنىڭ ايقىن دالەلى.
كاتماندۋداعى "Z ۇرپاقتىڭ بۇلىگى" مىڭداعان جاس ادامدى الاڭعا شىعاردى. ولار «الەۋمەتتىك جەلىنى جاپپا، جەمقورلىقتى جاپ!» دەگەن ۇرانمەن ءوز ۇكىمەتىنە قارسى تۇردى.
ناتيجەسىندە قاندى قاقتىعىس بولىپ، ونداعان ادام قازا تاپتى، جۇزدەگەنى جارالاندى. بۇل – مەملەكەت پەن جاستار اراسىنداعى ديالوگتىڭ جوقتىعىنان تۋعان قايعىلى جاعداي.
قازاقستان ءۇشىن بۇل وقيعادان الىناتىن ساباق كوپ.
بۇگىنگى قازاقستاندىق جاستار – سمارتفون مەن ينتەرنەت ءداۋىرىنىڭ بالالارى. ولار اقپاراتتى جىلدام قابىلدايدى، ادىلدىك پەن اشىقتىقتى تالاپ ەتەدى.
بيلىكپەن سويلەسۋدىڭ نەگىزگى ارناسى دا – الەۋمەتتىك جەلىلەر. ەگەر بۇل ارنا تارىلسا، جاستاردىڭ كوڭىلى تولمايدى، ال نارازىلىقتىڭ كوشەگە شىعۋى – زاڭدى قۇبىلىس.
كەز كەلگەن بيلىك اقپاراتتى باقىلاۋدى قالايدى. بىراق قازىرگى زاماندا بۇل ءتاسىل جۇمىس ىستەمەيدى. جاسىرىلعان وي باسقا جولمەن ءبارىبىر شىعادى.
قاي ءبىر كۇنى قازاقستاننىڭ وزگە ءوڭىرىن قايدام، وڭتۇستىكتە يۋتۋب جەلىسى ءىشىنارا شابانداپ، از ۋاقىت مۇلدەم جۇمىس ىستەمەي قالعانداي بولدى...
جۇمىس ىستەپ جاتقان وزگە الەۋمەتتىك جەلىلەردە يۋتۋب جۇمىسىنداعى اقاۋدى گ.باجكەنوۆانىڭ اتىشۋلى مالىمدەمەسىمەن بايلانىستىرىپ جاتتى.
ابىروي بولعاندا شابانداۋ ۇزاققا سوزىلمادى...
مەملەكەت باسشىسى كەشەگى جولداۋىندا جاستارعا سەنىم مەن قۇرمەت كورسەتۋ تۋراسىندا ءبىراز تاپسىرما بەردى. ەندىگى ماسەلە - جولداۋدا ايتىلعانداردى ورىنداۋشىلاردا...
قازاقستان ءۇشىن ەڭ دۇرىس جول – جاستاردىڭ الەۋمەتتىك الاڭداعى ءۇنىن تىڭداۋ، شىنايى ديالوگقا شىعۋ.
سەنىم – رەپرەسسيادان كۇشتىرەك قۇرال.
قازاقستان ءوزىن قۇقىقتىق مەملەكەت رەتىندە تانىتىپ كەلەدى. بۇل ۇستانىمنىڭ شىنايىلىعى تەك سوت زالىندا ەمەس، كوشەدە دە، الەۋمەتتىك جەلىلەردە دە سىنالادى. ەگەر بيلىك بەيبىت نارازىلىققا كۇشپەن جاۋاپ بەرسە، ول ءوز-وزىنە قارسى ارەكەت جاساعانمەن بىردەي.
نەپالداعى قايعىلى وقيعا – ءبىز ءۇشىن الدىن الا ەسكەرتۋ. الەۋمەتتىك جەلىلەردى جاۋىپ تاستاۋ نەمەسە قاتاڭ باقىلاۋعا الۋ قوعامدى تىنىشتاندىرمايدى، كەرىسىنشە جارىلىسقا يتەرمەلەيدى.
ال ەگەر پرەزيدەنتىمىز ايتقانداي، مەملەكەت جاستاردى سەرىكتەس رەتىندە قابىلداسا، ولاردىڭ اشىق پىكىرىن تىڭداسا، الەۋمەتتىك جەلى قوعامدى بولەتىن ەمەس، بىرىكتىرەتىن الاڭعا اينالارى انىق...
