جەلىدە قوناەۆ قالاسىنداعى ءبىر توپ جاستار اراسىنداعى جانجالدىڭ ۆيدەوسى تارادى، دەپ حابارلايدى “ادىرنا” ۇلتتىق پورتالى.
كوشە باقىلاۋ كامەراسىنان الىنعان بەينەجازبادان جاستاردىڭ الدىن الا دايىندالعانىن كورۋگە بولادى. ءبىرىنشى توپ جۇك سالعىشتان قانداي دا ءبىر قۇرالداردى شىعارىپ جاتقاندا ەكىنشى توپ ولاردى كولىكپەن قاعۋعا تىرىسقان.
كادرلاردا كەم دەگەندە ەكى ادامنىڭ قاعىلعانى بايقالادى. كەيىن ولاردىڭ سەرىكتەستەرى جارالانعانداردى كولىككە سالىپ الىپ كەتەدى.
الماتى وبلىسىنىڭ پوليتسياسى بۇل وقيعاعا تۇسىنىكتەمە بەردى. ولار كۇدىكتىلەردىڭ ۇستالعانىن جانە سوتقا دەيىنگى تەرگەۋ باستالعانىن مالىمدەدى.
«پوليتسەيلەر وقيعا ورنىندا جەدەل ارەكەت ەتىپ، ەكى كۇدىكتىنى انىقتاپ، ۇستاپ، ۋاقىتشا ۇستاۋ يزولياتورىنا قامادى. قازىرگى ۋاقىتتا بولعان جاعدايدىڭ بارلىق ءمان-جايىن جان-جاقتى انىقتاۋعا باعىتتالعان تەرگەۋ امالدارى جۇرگىزىلۋدە»، – دەلىنگەن وبلىستىق پوليتسيا حابارلاماسىندا.
