"Z" ūrpaqty äleumettık jelıden aiyru kışkentai säbidı emızıkten aiyrǧanmen bırdei. Bız keşe memleket basşysynyŋ joldauyn körıp, artynan talqylap jatqanda Nepalda jastar köşede dürlıgıp jatty...
XXI ǧasyrda äleumettık jelıler adam ömırınıŋ ajyramas bölıgıne ainaldy. Olar tek qana qarym-qatynas qūraly emes, oi erkındıgın bıldırudıŋ, bilıkke ün qatudyŋ, qoǧamdaǧy özgerısterge yqpal etudıŋ alaŋy bolyp otyr.
Nepal ükımetınıŋ 26 äleumettık jelını būǧattauyna qarsy jastar köterılısı – mūnyŋ aiqyn dälelı.
Katmandudaǧy "Z ūrpaqtyŋ bülıgı" myŋdaǧan jas adamdy alaŋǧa şyǧardy. Olar «Äleumettık jelını jappa, jemqorlyqty jap!» degen ūranmen öz ükımetıne qarsy tūrdy.
Nätijesınde qandy qaqtyǧys bolyp, ondaǧan adam qaza tapty, jüzdegenı jaralandy. Būl – memleket pen jastar arasyndaǧy dialogtyŋ joqtyǧynan tuǧan qaiǧyly jaǧdai.
Qazaqstan üşın būl oqiǧadan alynatyn sabaq köp.
Bügıngı qazaqstandyq jastar – smartfon men internet däuırınıŋ balalary. Olar aqparatty jyldam qabyldaidy, ädıldık pen aşyqtyqty talap etedı.
Bilıkpen söilesudıŋ negızgı arnasy da – äleumettık jelıler. Eger būl arna tarylsa, jastardyŋ köŋılı tolmaidy, al narazylyqtyŋ köşege şyǧuy – zaŋdy qūbylys.
Kez kelgen bilık aqparatty baqylaudy qalaidy. Bıraq qazırgı zamanda būl täsıl jūmys ıstemeidı. Jasyrylǧan oi basqa jolmen bärıbır şyǧady.
Qai bır künı Qazaqstannyŋ özge öŋırın qaidam, oŋtüstıkte iutub jelısı ışınara şabandap, az uaqyt müldem jūmys ıstemei qalǧandai boldy...
Jūmys ıstep jatqan özge äleumettık jelılerde iutub jūmysyndaǧy aqaudy G.Bajkenovanyŋ atyşuly mälımdemesımen bailanystyryp jatty.
Abyroi bolǧanda şabandau ūzaqqa sozylmady...
Memleket basşysy keşegı joldauynda jastarǧa senım men qūrmet körsetu turasynda bıraz tapsyrma berdı. Endıgı mäsele - joldauda aitylǧandardy oryndauşylarda...
Qazaqstan üşın eŋ dūrys jol – jastardyŋ äleumettık alaŋdaǧy ünın tyŋdau, şynaiy dialogqa şyǧu.
Senım – repressiiadan küştırek qūral.
Qazaqstan özın qūqyqtyq memleket retınde tanytyp keledı. Būl ūstanymnyŋ şynaiylyǧy tek sot zalynda emes, köşede de, äleumettık jelılerde de synalady. Eger bilık beibıt narazylyqqa küşpen jauap berse, ol öz-özıne qarsy äreket jasaǧanmen bırdei.
Nepaldaǧy qaiǧyly oqiǧa – bız üşın aldyn ala eskertu. Äleumettık jelılerdı jauyp tastau nemese qataŋ baqylauǧa alu qoǧamdy tynyştandyrmaidy, kerısınşe jarylysqa itermeleidı.
Al eger Prezidentımız aitqandai, memleket jastardy serıktes retınde qabyldasa, olardyŋ aşyq pıkırın tyŋdasa, äleumettık jelı qoǧamdy böletın emes, bırıktıretın alaŋǧa ainalary anyq...
