قازاقستاندىق كاسىپكەر، مەتسەنات، «TAS GROUP» كومپانيالار توبىنىڭ نەگىزىن قالاۋشى دۋلات تاستەكەي جەكە كۋالىكتەگى اتى-ءجونىن قازاقشا جازدىردى، دەپ حابارلايدى «ادىرنا» ءتىلشىسى.
«مەكتەپتە وقىپ جۇرگەنىمىزدە-اق تەگىمىزدى قازاقشالاۋعا مۇمكىندىك بەرىلگەن ەدى. ول كەزدە جاس بولدىق، ءمانىن ۇقپادىق، قۇنىقپادىق. كەيىن ەسەيە كەلە، بۇل ماسەلەگە تەرەڭىرەك وي جۇگىرتتىك. الايدا قۇجاتتاردى، ديپلومدى اۋىستىرۋدىڭ ماشاقاتى كوپ بولعاندىقتان، اسا قاتتى ءمان بەرمەي جۇرە بەرىپپىز.
سوڭعى جىلدارى وسى قادامعا بەلدى بەكەم بۋعانىممەن، گارۆاردتا وقىپ جۇرگەندە پاسپورتتى اۋىستىرۋ ۆيزاعا اسەر ەتۋى مۇمكىن بولعاندىقتان، بۇل ءىستى كەيىنگە قالدىردىم. ويتكەنى ۆيزانى قايتا راسىمدەۋ بارىسىندا، اسىرەسە شەكارادان وتكەندە، تەگى وزگەرگەن ادامدارعا قوسىمشا سۇراقتار قويىلاتىنىن تاجىريبەلى اعايىندار ەسكەرتكەن ەدى. سول سەبەپتى وقۋىمدى تامامداعانشا بۇل ويدى ىسىرىپ قويۋعا تۋرا كەلدى»،—دەدى ول.
ايتۋىنشا، شەتەلدە جۇرگەندە تەگىن كورگەن كەيبىر ادام ء«سىز كورشى ەلدىڭ ازاماتىسىز با؟» دەپ ءجيى سۇرايتىن بولعان.
«قۇجات تولتىرعاندا ەكى ارىپكە از جازىپ، ۋاقىت ۇنەمدەيتىن بولامىن. بىراق شىنىن ايتسام، شەتەلدە جۇرگەندە تەگىمدى كورىپ، ء«سىز كورشى ەلدىڭ ازاماتىسىز با، الدە سول ۇلتتىڭ وكىلىسىز بە؟» دەگەن ساۋالداردى ءجيى ەستىپ، ىشتەي قىنجىلاتىنمىن. ال بۇگىن، شۇكىر، سول ولقىلىقتىڭ ورنىن تولتىردىم. ەندى ءوزىمدى شىن مانىندە قازاقتىڭ، ءوز ۇلتىمنىڭ پەرزەنتى رەتىندە سەزىنەمىن. ال ءسىز ءوز تەگىڭىزدى وزگەرتۋ تۋرالى ويلانىپ كوردىڭىز بە؟ ۇلتتىق بولمىسىمىزدى ايشىقتاپ، تۇتاس ەتيكامىزدى ساقتاۋدا بۇل قادامنىڭ ءمانى زور ەمەس پە؟»–دەدى ول.
