Qazaqstandyq käsıpker, mesenat, «TAS GROUP» kompaniialar tobynyŋ negızın qalauşy Dulat Tastekei jeke kuälıktegı aty-jönın qazaqşa jazdyrdy, dep habarlaidy «Adyrna» tılşısı.
«Mektepte oqyp jürgenımızde-aq tegımızdı qazaqşalauǧa mümkındık berılgen edı. Ol kezde jas boldyq, mänın ūqpadyq, qūnyqpadyq. Keiın eseie kele, būl mäselege tereŋırek oi jügırttık. Alaida qūjattardy, diplomdy auystyrudyŋ maşaqaty köp bolǧandyqtan, asa qatty män bermei jüre berıppız.
Soŋǧy jyldary osy qadamǧa beldı bekem buǧanymmen, Garvardta oqyp jürgende pasportty auystyru vizaǧa äser etuı mümkın bolǧandyqtan, būl ıstı keiınge qaldyrdym. Öitkenı vizany qaita räsımdeu barysynda, äsırese şekaradan ötkende, tegı özgergen adamdarǧa qosymşa sūraqtar qoiylatynyn täjıribelı aǧaiyndar eskertken edı. Sol sebeptı oquymdy tämamdaǧanşa būl oidy ysyryp qoiuǧa tura keldı»,—dedı ol.
Aituynşa, şetelde jürgende tegın körgen keibır adam «Sız körşı eldıŋ azamatysyz ba?» dep jiı sūraityn bolǧan.
«Qūjat toltyrǧanda ekı ärıpke az jazyp, uaqyt ünemdeitın bolamyn. Bıraq şynyn aitsam, şetelde jürgende tegımdı körıp, «sız körşı eldıŋ azamatysyz ba, älde sol ūlttyŋ ökılısız be?» degen saualdardy jiı estıp, ıştei qynjylatynmyn. Al bügın, şükır, sol olqylyqtyŋ ornyn toltyrdym. Endı özımdı şyn mänınde qazaqtyŋ, öz ūltymnyŋ perzentı retınde sezınemın. Al sız öz tegıŋızdı özgertu turaly oilanyp kördıŋız be? Ūlttyq bolmysymyzdy aişyqtap, tūtas etikamyzdy saqtauda būl qadamnyŋ mänı zor emes pe?»–dedı ol.
