قازاقستاندىق تانىمال كاسىپكەر دۋلات تاستەكەي سەمەيلىك «ەلىماي» فۋتبول كلۋبىنىڭ اكتسيالارىن ساتىپ الىپ، ينۆەستور بولۋى مۇمكىن ەكەندىگى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
دۋلات تاستەكەي اباي وبلىسىنىڭ تۋماسى، ال اتالمىش ايماقتىڭ نامىسىن بۇگىنگى كۇنى پرەمەر-ليگادا قورعاپ جۇرگەن جالعىز ۇجىم – «ەلىماي». كلۋب كەلەر جىلى ۋەفا كونفەرەنتسيالار ليگاسىنىڭ ىرىكتەۋىندە باق سىناۋعا دايىندالىپ وتىر.
دەرەككوزدىڭ ايتۋىنشا، ەل فۋتبولىن دامىتۋ تاستەكەيدىڭ جوباسىندا بۇرىننان بار جوسپارلاردىڭ ءبىرى بولىپ تابىلادى.
ەسكە سالساق، 2025 جىلدىڭ تامىزىندا «ەلىماي» رەسمي تۇردە كوممەرتسيالىق ەمەس اكتسيونەرلىك قوعامعا اينالدى. كلۋب ەلىمىزدە كورپوراتيۆتىك باسقارۋ مودەلىن ەنگىزگەن العاشقى ۇجىم بولدى. الەمدىك تاجىريبەگە سۇيەنە وتىرىپ، مودەل «رەال مادريد»، «بارسەلونا»، «باۆاريا» سياقتى جەتەكشى ەۋروپالىق كلۋبتارعا ۇقساس تۇردە قۇرىلدى. كاپيتال 100 ملن تەڭگە كولەمىندە اكتسيا شىعارۋ ارقىلى قالىپتاستىرىلدى، قازىرگى تاڭدا كلۋب اكتسيونەرلەرى قاتارىندا قوعام قايراتكەرلەرى، تانىمال سپورتشىلار جانە ىسكەر تۇلعالار بار.
تاستەكەيدىڭ «ەلىمايعا» قىزىعۋشىلىعى قازاقستانداعى فۋتبول كلۋبتارىن كەزەڭ-كەزەڭىمەن قارجىلاندىرۋ پروتسەسىمەن سايكەس كەلەدى. بۇعان دەيىن Qazaq Stroy كومپانياسىنىڭ يەسى نۇرلان ارتىقباەۆ «اقتوبە» فۋتبول كلۋبىنا ينۆەستور بولعان. سونداي-اق قازاقستان پرەمەر-ليگاسىندا ونەر كورسەتەتىن تاعى ءۇش ۇجىم ينۆەستور تارتقان بولاتىن.
قىزىلوردالىق «قايسار» TAU Group Ltd كومپانياسىنىڭ يەسى يسلامعالي قوزباقوۆقا ءوتتى. ينۆەستيتسيا كولەمى – 12 ملرد تەڭگە. پەتروپاۆلدىق «قىزىلجارعا» تساتەك كومپانياسىنىڭ يەسى سەرگەي كانن يەلىك ەتتى. كاسىپكەر كلۋبقا جىل سايىن كەمىندە 1 ملرد تەڭگە سالۋعا مىندەتتەندى.
ەلوردالىق «جەڭىستى» ميحايل لومتادزەگە بەرىلدى. ول كلۋبقا ارنالعان فۋتبول اكادەمياسىن قۇرۋعا 16 ملرد تەڭگە جۇمساۋعا دايىن ەكەنىن مالىمدەگەن.
سونىمەن قاتار، قاراعاندىلىق «شاحتەر» كلۋبى كاسىپكەر تيمۋر تۋرلوۆتىڭ قول استىنا ءوتتى. تانىمال كاسىپكەر «كەنشىلەرگە» 18 ملرد تەڭگە بولەتىنىن جاريالاعان ەدى.
قازىرگى ۋاقىتتا «تاراز» پەن «ەرتىس» كلۋبتارى ءىرى ينۆەستورلارمەن كەلىسسوزدەر جۇرگىزۋدە.
