ەرەيمەنتاۋدا وتكەن تۋرنيردە 2010 جىلى تۋعان جاس بالۋان ەسىنەن تانىپ قالدى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىلەردە تاراعان ۆيدەو قوعامدا الاڭداۋشىلىق تۋدىرىپ، كەي پىكىرلەردە ونىڭ كوز جۇمعانى ايتىلدى.
الايدا رەسمي دەرەككە سايكەس، سپورتشى ءتىرى جانە قازىر استاناداعى №2 كوپسالالى قالالىق بالالار اۋرۋحاناسىنىڭ جانساقتاۋ بولىمىندە ەم قابىلداپ جاتىر.
اقمولا وبلىسىنىڭ سپورت باسقارماسىنىڭ مالىمەتىنشە، اقتوبە وبلىسىنىڭ تۋماسى سانالاتىن سپورتشى 50 كەلىگە دەيىنگى سالماق دارەجەسىندە ونەر كورسەتكەن. ءى سپورتتىق رازرياد يەگەرى ءارى تاجىريبەلى بالۋان ءادىس ورىنداۋ كەزىندە مويىن ومىرتقاسىنان جاراقات الىپ، ەسىنەن تانىپ قالعان. وقيعا ورنىندا دارىگەر جەدەل تۇردە جۇرەك-وكپە رەانيماتسياسىن جاساپ، كەيىن ول ەرەيمەنتاۋ اۋداندىق اۋرۋحاناسىنا جەتكىزىلدى. جۇرەك قىزمەتى قالپىنا كەلتىرىلگەن سوڭ سپورتشى جاساندى تىنىس الۋ اپپاراتىنا قوسىلدى.
وقيعاعا بايلانىستى جارىس توقتاتىلىپ، بالۋان سانيتارلىق اۆياتسيا كومەگىمەن استاناعا جەتكىزىلدى. قازىرگى تاڭدا وعان جوعارى مامانداندىرىلعان مەديتسينالىق كومەك كورسەتىلۋدە.
Qazaq kuresi قاۋىمداستىعى ءتۋرنيردىڭ رەسمي جارىستار تىزىمىنە ەنگىزىلگەنىن جانە بارلىق قاۋىپسىزدىك تالاپتارىنىڭ ساقتالعانىن حابارلادى. اسسوتسياتسيا جاس سپورتشىنىڭ جاعدايىن تۇراقتى باقىلاۋدا ۇستاپ وتىر.
