قازاقستاندىق سپورتشى ەسەنتاي قاپارۇلى ارداگەرلەر اراسىنداعى الەم چەمپيوناتىندا توپ جارىپ، قوس جۇلدەمەن ورالدى، دەپ حابارلايدى "ادىرنا" ءتىلشىسى.
2023 جىلى 17 قازاندا گرەتسيا مەملەكەتى لۋتراكي قالاسىندا وتكەن ارداگەرلەر اراسىنداعى ەركىن كۇرەستەن الەم چەمپيوناتىندا التىن مەدال يەگەرى اتانىپ، كوك بايراعىمىزدى جارىس تورىندە جەلبىرەتتى.
سونداي-اق، گرەك-ريم كۇرەسى بويىنشا دا بەلدەسىپ، فينالدا مىسىردىڭ اتاقتى سپورتشىسى، گرەك-ريم جانە فريستايل شەبەرى، وليمپيادا ويىندارىنىڭ چەمپيونى جانە جۇلدەگەرى، الەم چەمپيونى، اتاقتى اڭىز پالۋان كارام گابەرمەن تايتالاستى. جەرلەسىمىز بۇل سايىستا كۇمىس جۇلدە يەگەرى اتانىپ، ەلگە ورالدى.
بۇگىندە 45 جاستاعى پالۋان 7 بالانىڭ اكەسى، رەسپۋبليكالىق سپورت كوللەدجىندە اعا جاتتىقتىرۋشى. ەسەنتاي قاپارۇلى:
"سپورتپەن ەس بىلگەلى اينالىسىپ كەلەمىن. كۇرەستە 19 جاسىمنان بەرى ءجۇرمىن. قازىرگى تاڭدا قاراماعىمدا 60-قا جۋىق وقۋشىم بار. كوپ وقۋشىلارىم ەركىن كۇرەستەن ۇلتتىق قۇرامادا ونەر كورسەتىپ ءجۇر",-دەيدى.
دەگەنمەن، ەسەنتاي قاپارۇلىنىڭ اپكەسى ەلىمىزدە" سپورتشىلارعا لايىقتى جاعداي جاسالمايدى" دەپ نارازى.
"- جىلدا باۋىرىم ۇلكەن جارىستارعا قاتىسادى. ۇكىمەتتەن قولداۋ بولماي تۇر. ءوزىنىڭ جەتى بالاسى بار. العاشقى بالالارى تورتەم. التى قىز، ءبىر بالاسىن اسىراۋ قاجەت. بىراق بالالارىنىڭ اۋزىنان جىرىپ، وسىنداي جارىستارعا بارلىق شىعىندى ءوز قالتاسىنان تولەۋگە ءماجبۇر. مەنىڭشە، ەلىمىزدە سپورتشىلارعا جاعداي جاسالۋى ءتيىس. وسىنى تىڭداپ، ەسكەرەتىن ادام بولسا",- دەيدى باقشاگۇل قاپار.
كوك تۋىمىزدى كوككە جەلبىرەتكەن سپورتشىنى اۋەجايدان كۇتىپ الۋعا 80 جاستاعى اتا-اناسى مەن بارشا تۋعان-تۋىستارى، دوستارى جينالعان.
تالانتتى سپورتشى 2022 جىلى بولگاريا مەملەكەتى پلوۆديۆ قالاسىندا وتكەن الەم چەمپيوناتىندا ەركىن كۇرەستەن ارداگەرلەر اراسىندا باق سىناپ، "الەم چەمپيونى" اتانعان.
ەسەنتاي قاپارۇلى ءالى تالاي سايىستاردا ونەر كورسەتىپ، مىقتى شاكىرتتەردى تاربيەلەۋدى كوزدەپ وتىر.
