موڭعوليا پرەمەر-ءمينيسترى گومبوجاۆىن زاندانشاتار قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋدى قابىلدادى، دەپ حابارلايدى "ادىرنا" ۇلتتىق پورتالى.
مۇرات نۇرتىلەۋ موڭعولياعا رەسمي ساپارمەن باردى.
كەزدەسۋ بارىسىندا پرەمەر-مينيستر زاندانشاتار موڭعوليانىڭ ورتالىق ازيا ەلدەرىمەن، سونىڭ ىشىندە ستراتەگيالىق ارىپتەسى – قازاقستانمەن قارىم-قاتىناس پەن ىنتىماقتاستىقتى نىعايتۋعا ەرەكشە ءمان بەرەتىنىن اتاپ ءوتتى. وسى ورايدا ول اۆتوكولىك تاسىمالى، اۋىل شارۋاشىلىعى، جەڭىل ونەركاسىپ، تۋريزم، مادەنيەت، ءبىلىم، عىلىم جانە اقپاراتتىق تەحنولوگيالار سياقتى ءتۇرلى سالالارداعى ءوزارا بايلانىستى جانداندىرۋعا دايىن ەكەنىن ءبىلدىردى.
تاراپتار ەكى ەل اراسىنداعى مال شارۋاشىلىعى، اۋىل شارۋاشىلىعى، جەڭىل ونەركاسىپ جانە شاعىن مەن ورتا بيزنەس سالالارىندا ءوزارا ءتيىمدى ەكونوميكالىق ىنتىماقتاستىقتىڭ الەۋەتى جوعارى ەكەنىن اتاپ ءوتتى. بۇل اگرارلىق سەكتوردىڭ باي رەسۋرستارىن ەسكەرە وتىرىپ جۇزەگە اسىرىلۋى مۇمكىن.
كەزدەسۋدە جاڭا قىسقا كولىك باعىتتارى مەن لوگيستيكالىق دالىزدەردى قۇرۋ ماسەلەسىنە ەرەكشە نازار اۋدارىلدى. بۇل تاۋارلار مەن ونىمدەردىڭ ءتۇر-ءتۇرىن كەڭەيتۋگە، سونداي-اق بيزنەسكە قولايلى جاعداي جاساۋعا مۇمكىندىك بەرەدى. سونىمەن قاتار، بۇل قادام ەكىجاقتى ساۋدا اينالىمىن 500 ميلليون اقش دوللارىنا دەيىن ارتتىرۋعا، تاسىمالداردىڭ جىلدامدىعى مەن تۇراقتىلىعىن قامتاماسىز ەتۋگە جانە وڭىرلىك ساۋدا مەن ىنتىماقتاستىقتى ىنتالاندىرۋعا باعىتتالعان ماڭىزدى قادام بولماق.
قازاقستان سىرتقى ىستەر ءمينيسترى مۇرات نۇرتىلەۋ مەملەكەت باسشىلارى قول جەتكىزگەن ۋاعدالاستىقتاردى ىسكە اسىرۋ ارقىلى ەكىجاقتى قاتىناستاردى ودان ءارى دامىتۋعا جانە تەرەڭدەتۋگە دايىن ەكەنىن راستادى.
تاراپتار موڭعوليا مەن قازاقستان اراسىنداعى ستراتەگيالىق ارىپتەستىكتى نىعايتۋعا باعىتتالعان مينيسترلىكتەر مەن ۇيىمدار اراسىنداعى تىعىز ىنتىماقتاستىقتى جوعارى باعالاپ، وسى باعىتتاعى بەلسەندى جۇمىستى جالعاستىرۋعا نيەتتى ەكەندەرىن ءبىلدىردى.
ماۋسىم ايىنىڭ باسىندا جەمقورلىققا قارسى نارازىلىقتاردان سوڭ ەلدىڭ بۇرىنعى پرەمەر-ءمينيسترى لۋۆساننامسراين ويۋن-ەردەنە وتستاۆكاعا كەتكەن. نارازىلىق شەرۋىندە ادامدار ويۋن-ەردەنەدەن 22 جاستاعى ۇلىنىڭ تابىس كوزىن اشىق جاريالاۋدى تالاپ ەتكەن. ونىڭ قالىڭدىعى الەۋمەتتىك جەلىلەردە قىمبات سىيلىقتاردىڭ سۋرەتتەرىن جاريالاعان: بريلليانت جۇزىك، كولىك جانە برەندتىك سومكە.
