Qazaqstan–Qytai qatynastary soŋǧy jyldary jüielı türde damyp, jaŋa sapalyq deŋgeige köterıldı. 2024 jyly ekıjaqty sauda ainalymy 44 mlrd AQŞ dollaryna jetıp, rekordtyq körsetkış ornatty. 2025 jyly da oŋ dinamika saqtaluda. Būl serıktestıktıŋ tūraqty ärı ūzaqmerzımdı sipatyn däleldeidı.
Bügınde yntymaqtastyq tek tauar ainalymymen şektelmei, energetika, kölık-logistika, önerkäsıp jäne sifrlandyru baǧyttaryn qamtyp otyr. Qazaqstan–Qytai ıskerlık keŋesı siiaqty alaŋdar ırı jobalardy ılgerıletuge jäne investisiia tartuǧa mümkındık berude.
Gumanitarlyq saladaǧy bailanystar da jaŋa deŋgeige şyqty. 2025 jyldyŋ Qazaqstandaǧy Qytai turizmınıŋ jyly dep jariialanuy halyqtar arasyndaǧy mädeni almasudy keŋeitedı. «Lu Ban» şeberhanalarynyŋ aşyluy jäne Beijıŋde Qazaqstan mädeniet ortalyǧyn qūru bastamasy bılım men mädeniet salasyndaǧy yntymaqtastyqtyŋ ūzaq merzımdı negızın qalaidy.
Osy tūrǧydan alǧanda, Prezident Qasym-Jomart Toqaevtyŋ Tianszin qalasyna sapary men QHR Töraǧasy Si Szinpinmen kezdesuı erekşe maŋyzǧa ie. Būl kelıssözder strategiialyq serıktestıktıŋ mänın naqtylap qana qoimai, aldaǧy jyldarǧa baǧyt-baǧdar berdı. Mūndai joǧary deŋgeidegı kezdesuler özara senımdı arttyryp, jahandyq bäsekelestık jaǧdaiynda ortaq müddelerdı üilestıruge yqpal etedı.
Qorytyndylai kele, Qazaqstan men Qytai qatynastarynyŋ qazırgı qarqyny ärıptestıktıŋ bırtındep ärtaraptanyp, jaŋa kezeŋge aiaq basqanyn aiqyn körsetıp otyr. Būl ürdıs öŋırlık tūraqtylyq pen damu üşın şeşuşı faktorǧa ainaluda.
Bauyrjan Äuken, QSZİ Aziialyq zertteuler bölımınıŋ jetekşı sarapşysy
