پولشاداعى رادوم قالاسىندا اۋە شوۋىنا دايىندىق بارىسىندا F-16 جويعىش ۇشاعى اپاتقا ۇشىراپ، پيلوت قازا تاپتى. بۇل تۋرالى 28 تامىز كۇنى كەشكە پولشا ۇكىمەتىنىڭ ءباسپاسوز حاتشىسى ادام شلاپكا الەۋمەتتىك جەلىدەگى پاراقشاسىندا مالىمدەدى، دەپ حابارلايدى “ادىرنا”.
«رادومداعى تراگەديا: اۋە شوۋىنا دايىندىق كەزىندە F-16 جويعىش ۇشاعى قۇلادى. وكىنىشكە قاراي، پيلوت قازا تاپتى»، – دەدى ول.
ونىڭ ايتۋىنشا، پولشا ۇلتتىق قورعانىس ءمينيسترى ۆلاديسلاۆ كوسينياك-كامىش وقيعا ورنىنا بەت العان. ول پرەمەر-مينيستر دونالد تۋسكپەن ۇنەمى بايلانىستا ەكەندىگىن اتاپ ءوتتى.
كەيىنىرەك مينيستر الەۋمەتتىك جەلىدە ءوزى وقيعا ورنىنا كەلگەنىن حابارلادى.
«F-16 جويعىشىنىڭ اپاتى سالدارىنان پولشا ارمياسىنىڭ ۇشقىشى – ارقاشان وتانعا ادالدىقپەن جانە ۇلكەن ەرلىكپەن قىزمەت ەتكەن وفيتسەر قازا تاپتى. ونىڭ رۋحىنا تاعزىم ەتەمىن. وتباسى مەن جاقىندارىنا شىن جۇرەكتەن كوڭىل ايتامىن»، – دەپ جازدى كوسينياك-كامىش.
ول بۇل جاعدايدى اۋە كۇشتەرى مەن بۇكىل پولشا ارمياسى ءۇشىن ۇلكەن قايعى ەكەنىن ايتتى.
پولشا پرەزيدەنتى كارول ناۆروتسكي مەن پرەمەر-مينيستر دونالد تۋسك تا اپاتقا قاتىستى پىكىر ءبىلدىردى.
«F-16 جويعىشىنىڭ اپاتى مەن ۇشقىشتىڭ قازا تاپقانى تۋرالى وتە قايعىلى حابار الدىم. وتباسىنا شىن جۇرەكتەن كوڭىل ايتامىن. قۇداي ونىڭ جانىن ءجانناتتان ەتسىن»، – دەپ جازدى ناۆروتسكي.
«F-16 ۇشاعىنىڭ اپاتى سالدارىنان پولياك ۇشقىشى قازا تاپتى. توپىراعى تورقا بولسىن! وتباسى مەن تۋىستارىنا بارشا جۇرەگىممەن قايعىرا كوڭىل ايتامىن»، – دەدى تۋسك.
جويعىش ۇشاقتىڭ اپاتقا ۇشىراعان ءساتى تۇسىرىلگەن ۆيدەولاردى الەۋمەتتىك جەلى قولدانۋشىلارى جاريالاپ ۇلگەردى.
