جاپونيانىڭ يسيكاۆا پرەفەكتۋراسىندا بولعان كۇشتى جەر سىلكىنىسىنەن زارداپ شەككەندەردىڭ سانى 62 ادامعا جەتتى، دەپ حابارلايدى “ادىرنا” ۇلتتىق پورتالى جەرگىلىكتى كيودو اگەنتتىگىنە سىلتەپ.
«نوتو تۇبەگىندەگى جەر سىلكىنىسىنەن قايتىس بولعانداردىڭ سانى راستالعان دەرەك بويىنشا 62-گە جەتتى»، - دەلىنگەن حابارلامادا.
زارداپ شەككەندەردىڭ ەڭ كوپ سانى ۆادزيما جانە سۋزۋ قالالارىندا تىركەلدى – مۇندا جەر سىلكىنىسى سالدارىنان تيىسىنشە 29 جانە 22 ادام قازا تاپتى. بۇعان دەيىن 55 قۇربان بولعانى ايتىلعان ەدى. قۇلاعان ۇيلەردىڭ قيراندىلارىنىڭ استىندا ادامدار دا بولۋى مۇمكىن. جۇزدەن استام ادام جاراقات الدى.
جاڭا جىل كۇنى جاپونيانىڭ باتىسىندا بىرنەشە كۇشتى جەر سىلكىنىسى بولدى، ولاردىڭ ەڭ كۇشتىسى ماگنيتۋداسى 7,6 بولدى. ولارعا «نوتو تۇبەگىندەگى جەر سىلكىنىسى» دەگەن اتاۋ بەرىلدى. جەراستى دۇمپۋلەرى وساكا، كيوتو جانە توكيودا دا سەزىلدى. جاپونيانىڭ باس مەتەورولوگيالىق اگەنتتىگىنىڭ حابارلاۋىنشا، اپات 1885 جىلدان بەرى ايماقتا بولعان ەڭ اۋىر اپات بولدى.
جەر استى دۇمپۋلەرى عيماراتتاردىڭ قيراۋىنا، جۇردەك پويىزدار قوزعالىسىنىڭ توقتاپ قالۋىنا اكەپ سوقتى، 32 مىڭنان استام ءۇي جارىقسىز قالدى. كەيبىر وڭىرلەردە سۋ قۇبىرى دا، كوممۋنيكاتسيا دا جوق، جول جامىلعىسى بۇزىلعان. ازىرگە اتوم ەلەكتر ستانتسياسىنىڭ جۇمىسىندا اقاۋلار انىقتالعان جوق.
