اقتاۋداعى اكىمشىلىك قۇقىقبۇزۋشىلىقتار جونىندەگى مامانداندىرىلعان سوتتا استانا – اقتاۋ باعىتىنداعى رەيستە جولاۋشىنىڭ بورتسەرىككە شابۋىل جاساۋ دەرەگىنە قاتىستى ۇكىم شىعارىلدى. بۇل تۋرالى "لادا" باسىلىمى جازدى، دەپ حابارلايدى “ادىرنا” ۇلتتىق پورتالى.
قۇقىق قورعاۋ ورگاندارى جولاۋشىنىڭ ارەكەتىن "ۇساق بۇزاقىلىق" دەپ باعالاپ، قر اقبتك-ءنىڭ 434-بابى 1-بولىگى بويىنشا اكىمشىلىك قۇقىقبۇزۋشىلىق تۋرالى حاتتاما تولتىرعان. اتالعان باپتىڭ سانكتسياسى رەتىندە 20 اەك (78 640 تەڭگە) كولەمىندە ايىپپۇل نە 5-تەن 15 تاۋلىككە دەيىن اكىمشىلىك قاماۋعا الۋ قاراستىرىلعان.
سوت وتىرىسى بارىسىندا ەر ادام كىناسىن تولىق مويىنداپ، جاساعان ارەكەتىنە شىن جۇرەكتەن وكىنىش ءبىلدىردى. سونداي-اق، ول اسىراۋىندا بەس بالاسى بار ەكەنىن ايتىپ، سوتتان ايىپپۇلمەن جازالاۋدى سۇرادى.
ونىڭ كىناسى جابىرلەنۋشىنىڭ تۇسىنىكتەمەسى مەن ءتۇسىندىرۋ حاتى، پوليتسيا ينسپەكتورىنىڭ راپورتى، اكىمشىلىك قۇقىقبۇزۋشىلىق تۋرالى حاتتاما جانە ءىستىڭ باسقا دا ماتەريالدارىمەن دالەلدەنگەن.
سوت ۇكىم شىعارعان كەزدە ونىڭ كىنانى تولىق مويىنداۋى، شىن كوڭىلدەن وكىنىش ءبىلدىرۋى جانە بەس بالاسىنىڭ بارىن جاۋاپكەرشىلىكتى جەڭىلدەتەتىن ءمان-جايلار رەتىندە ەسكەردى. ىسكە بايلانىستى اۋىرلاتاتىن ءمان-جايلار انىقتالعان جوق.
"سوت قاۋلىسى بويىنشا، ك. قر اقبتك-ءنىڭ 434-بابى 1-بولىگى بويىنشا كىنالى دەپ تانىلىپ، وعان 55 048 تەڭگە كولەمىندە اكىمشىلىك ايىپپۇل سالىندى. سوت جاۋاپكەرشىلىكتى جەڭىلدەتەتىن ءمان-جايلاردى ەسكەرە وتىرىپ، اقبتك-ءنىڭ 829-11-بابىنىڭ 2-تارماعىنا سايكەس ايىپپۇل كولەمىن 30 پايىزعا قىسقارتتى", – دەپ حابارلادى سوتتىڭ ءباسپاسوز قىزمەتى.
ەسكە سالساق، جولاۋشى مەن بورتسەرىك اراسىنداعى جانجال 20 ساۋىردە ساعات 00:05-تە ۇشاق اقتاۋعا قونعاننان كەيىن باستالعان. جولاۋشىلاردىڭ ءبىرىنىڭ ايتۋىنشا، جانجالدى باستاعان ادام ۇشاق سالونىندا ۇيالى تەلەفونىن ۇمىتىپ كەتكەن.
بورتقا قايتا كىرۋگە ارەكەت جاساعان جولاۋشىنى بورتسەرىك توقتاتىپ، ۇشاقتان ءالى ادامدار شىعىپ جاتقاندىقتان، ءسال كۇتە تۇرۋىن سۇراعان. تەلەفون يەسى ەسكەرتۋگە قۇلاق اسپاي، ىشكە كىرۋگە ارەكەت جاساي بەرگەن سوڭ، بورتسەرىك ونى ءوزى بارىپ اكەلىپ بەرەتىنىن ايتقان. الايدا جولاۋشى اۋەكومپانيا قىزمەتكەرىنىڭ سوڭىنا جارماسىپ، ونىڭ بەتىنە سوققى جاساعان.
