رەسەي فەدەراتسياسىنىڭ تەرگەۋ كوميتەتى AZAL اۋە كومپانياسىنىڭ ۇشاعىنا قاتىستى قىلمىستىق ءىستى توقتاتۋ تۋرالى شەشىم قابىلداۋىنا قاتىستى ازەربايجان پىكىر ءبىلدىردى، دەپ حابارلايدى "ادىرنا" ۇلتتىق پورتالى.
بۇل تۋرالى ازەربايجاننىڭ سىرتقى ىستەر ءمينيسترى دجەيحۋن بايراموۆ جىل قورىتىندىسى بويىنشا ءسىم ەسەبىنىڭ تانىستىرىلىمى كەزىندە جۋرناليستەردىڭ سۇراقتارىنا جاۋاپ بەرە وتىرىپ مالىمدەدى.
ءمينيستردىڭ ايتۋىنشا، رەسەيدىڭ تەرگەۋ كوميتەتى AZAL ۇشاعىنىڭ اپاتىنا بايلانىستى تەرگەۋ بارىسى جونىندە ازەربايجانعا رەسمي حات جولداعان. «حاتتا ءبىزدى قاتتى تاڭعالدىرعان جايتتار بولدى. ەڭ باستى ماسەلە – قىلمىستىق ءىستىڭ توقتاتىلعانى تۋرالى اقپاراتتىڭ كورسەتىلۋى. ارينە، مۇنداي شەشىم بىزدە وتە ماڭىزدى سۇراقتار تۋدىرادى. وسىعان بايلانىستى ءتيىستى ۆەدومستۆو تاراپىنا سۇراۋ سالىندى»، – دەدى بايراموۆ.
سىرتقى ىستەر ءمينيسترى ازەربايجاننىڭ باستى كۇتكەنى – رەسەيلىك تاراپتىڭ ءوز مىندەتتەمەلەرىن تولىق ورىنداۋى ەكەنىن اتاپ ءوتتى. «كەشە ۇشاق اپاتىنىڭ جىلدىعى بولدى. وسى قايعىلى وقيعادان قازا تاپقان ازاماتتاردىڭ وتباسىلارىنا تاعى دا كوڭىل ايتامىن. ۇشاقتىڭ اتىپ تۇسىرىلگەنى بەلگىلى ءبىر ۋاقىت وتكەن سوڭ رەسەي تاراپى تاراپىنان مويىندالىپ، وتەماقى تولەۋ تۋرالى مالىمدەمە جاسالدى. بۇل وتە ماڭىزدى قادام بولدى. ءبىزدىڭ كۇتكەنىمىز – وسى ۇدەرىستىڭ تولىق جۇزەگە اسىرىلۋى»، – دەدى ول.
ايتا كەتەيىك، اپاتتىڭ جىلدىعىندا قازاقستان تاراپى تەكسەرىستەردىڭ ارالىق قورىتىندىسىن جاريالاعان. ەندىگىدە ازەربايجان تاراپى كەلەسى كەزەڭدە قازاقستاندىق تاراپى سوڭعى قورىتىندى ەسەپ ءماتىنىن قوعامعا ۇسىنۋى ءتيىس دەپ ەسەپتەيدى. بۇل اياقتالعان تەرگەۋدىڭ ناتيجەلەرىن كورسەتەدى. قورىتىندى ەسەپتە تەرگەۋ بارىسىندا انىقتالعان بارلىق فاكتىلەردى قامتۋى، اپاتتىڭ سەبەپتەرىن تالداۋى جانە بولاشاقتا وسىنداي اپاتتاردىڭ الدىن الۋ بويىنشا ۇسىنىستار بەرىلۋى قاجەت دەپ ەسەپتەيدى باكۋ تاراپى.
ايتا كەتەيىك، 2024 جىلدىڭ 25 جەلتوقسانىندا اقتاۋ قالاسى ماڭىندا Azerbaijan Airlines كومپانياسىنا تيەسىلى Embraer 190 ۇشاعى (تىركەۋ ءنومىرى 4K-AZ65) اپاتقا ۇشىرادى. ۇشاق باكۋ (ازەربايجان) – گروزنىي (رەسەي) باعىتى بويىنشا ۇشىپ كەلە جاتىپ، قوناتىن تۇستا بەلگىسىز جاعدايعا ۇشىراپ، كاسپيدىڭ ەكىنشى جاعاسىنداعى قازاقستان جەرىنە ۇشىپ جەتكەن.
اپات سالدارىنان بارلىعى 38 ادام قازا تاۋىپ، ونىڭ ىشىندە 3 ەكيپاج مۇشەسى بار، ال 29 ادام ءارتۇرلى دارەجەدە جاراقات الدى.
