باكۋدەن گروزنىيعا ۇشىپ بارا جاتقان ازەربايجاننىڭ AZAL جولاۋشىلار ۇشاعىن رەسەيلىك اۋە شابۋىلىنا قارسى قورعانىس جۇيەلەرى اتىپ تۇسىرگەنى جالعاسىپ جاتقان قارۋلى قاقتىعىستىڭ ازاماتتىق اۆياتسياعا ەرەكشە قاتەرلى ەكەنىن كورسەتەدى.
بۇل تۋرالى Report-قا ميۋنحەن قاۋىپسىزدىك كونفەرەنتسياسىندا زەرتتەۋشى نيكو لانگە مالىمدەدى، دەپ حابارلايدى “ادىرنا” ۇلتتىق پورتالى.
«بۇل جاي عانا اۆياتسيالىق قاۋىپسىزدىك وقيعاسى ەمەس، بۇل رەسەيلىك اۋە قورعانىس جۇيەسى ازاماتتىق ۇشاعىن اتىپ تۇسىرگەن وقيعا. مۇنداعى باستى ماسەلە - رەسەيدىڭ ۋكرايناعا قارسى اگرەسسيۆتى سوعىسى»، - دەدى ول.
ونىڭ ايتۋىنشا، بولاشاقتا مۇنداي قايعىلى وقيعالاردىڭ الدىن الۋ ءۇشىن جالعىز جول - ايماقتا تۇراقتى بەيبىتشىلىك ورناتۋ.
«وكىنىشكە قاراي، ەۋروپا ەلدەرى بۇل قاقتىعىستى شەشۋدە جەتكىلىكتى ارەكەت ەتپەي وتىر. پرەزيدەنت ترامپتىڭ ىقتيمال باستامالارى ايتارلىقتاي ناتيجەلەرگە اكەلەتىنىنە دە كۇمانىم بار. اۆياتسيالىق قاۋىپسىزدىك تۇرعىسىنان العاندا، نەگىزگى حابارلاما ازاماتتىق ۇشاقتاردىڭ اسكەري ماقساتتا قاتەلەسۋ قاۋپىن جويۋ ءۇشىن سوعىستى توقتاتۋ كەرەك.
دروندار، زىمىراندار مەن جولاۋشىلار ۇشاقتارى اراسىنداعى شاتاسۋ - قاقتىعىستىڭ جالعاسۋىنىڭ تىكەلەي سالدارى. بۇل جاعداي شەشىلمەيىنشە، ازاماتتىق اۆياتسياعا قاۋىپ-قاتەر ساقتالادى»، - دەپ قورىتىندىلادى ن. لانگە.
اقپان ايىنىڭ باسىندا اپاتقا قاتىستى الدىن الا تەرگەۋ ەسەبى جاريالاندى. قۇجات بويىنشا ۇشاقتىڭ فيۋزەلياجىندا سىرتقى اسەردەن بولعان زاقىمدار انىقتالعان.
ەسەپتە قۇس سوعىلۋ نەمەسە وتتەگى باللونىنىڭ جارىلۋى تۋرالى مالىمەتتەر جوق. 05:13:32-دە ۇشاقتىڭ نەگىزگى باسقارۋ جۇيەلەرى ىستەن شىققانى، تەك 05:21:42-دە گروزنىيداعى ديسپەتچەردىڭ «كوۆەر» وپەراتسياسىن باستاعانى تۋرالى حابارلاعانى كورسەتىلگەن.
ەسكە سالا كەتەيىك، 2024 جىلدىڭ 25 جەلتوقسانىندا باكۋ-گروزنىي رەيسىن ورىنداعان «ازەربايجان اۋە جولدارىنىڭ» جولاۋشىلار ۇشاعى اقتاۋ قالاسىنا جاقىن جەردە اپاتقا ۇشىراعان. ۇشاقتا 67 ادام بولعان، ونىڭ 38-ءى قازا تاۋىپ، 29 ادام امان قالعان.
الدىن الا مالىمەتتەر بويىنشا، اپاتتىڭ سەبەبى رەسەيدىڭ اۋە كەڭىستىگىندەگى گروزنىي ماڭىندا سىرتقى فيزيكالىق جانە تەحنيكالىق اسەردەن بولعان.
