Polşadaǧy Radom qalasynda äue şouyna daiyndyq barysynda F-16 joiǧyş ūşaǧy apatqa ūşyrap, pilot qaza tapty. Būl turaly 28 tamyz künı keşke Polşa ükımetınıŋ baspasöz hatşysy Adam Şlapka äleumettık jelıdegı paraqşasynda mälımdedı, dep habarlaidy “Adyrna”.
«Radomdaǧy tragediia: äue şouyna daiyndyq kezınde F-16 joiǧyş ūşaǧy qūlady. Ökınışke qarai, pilot qaza tapty», – dedı ol.
Onyŋ aituynşa, Polşa ūlttyq qorǧanys ministrı Vladislav Kosiniak-Kamyş oqiǧa ornyna bet alǧan. Ol premer-ministr Donald Tuskpen ünemı bailanysta ekendıgın atap öttı.
Keiınırek ministr äleumettık jelıde özı oqiǧa ornyna kelgenın habarlady.
«F-16 joiǧyşynyŋ apaty saldarynan Polşa armiiasynyŋ ūşqyşy – ärqaşan Otanǧa adaldyqpen jäne ülken erlıkpen qyzmet etken ofiser qaza tapty. Onyŋ ruhyna taǧzym etemın. Otbasy men jaqyndaryna şyn jürekten köŋıl aitamyn», – dep jazdy Kosiniak-Kamyş.
Ol būl jaǧdaidy Äue küşterı men bükıl Polşa armiiasy üşın ülken qaiǧy ekenın aitty.
Polşa prezidentı Karol Navroskii men premer-ministr Donald Tusk ta apatqa qatysty pıkır bıldırdı.
«F-16 joiǧyşynyŋ apaty men ūşqyştyŋ qaza tapqany turaly öte qaiǧyly habar aldym. Otbasyna şyn jürekten köŋıl aitamyn. Qūdai onyŋ janyn jännattan etsın», – dep jazdy Navroskii.
«F-16 ūşaǧynyŋ apaty saldarynan poliak ūşqyşy qaza tapty. Topyraǧy torqa bolsyn! Otbasy men tuystaryna barşa jüregımmen qaiǧyra köŋıl aitamyn», – dedı Tusk.
Joiǧyş ūşaqtyŋ apatqa ūşyraǧan sätı tüsırılgen videolardy äleumettık jelı qoldanuşylary jariialap ülgerdı.
