قازاقستان يوردانيانىڭ تاجىريبەسىن نەگىزگە الا وتىرىپ دروندار ءوندىرىسىن دامىتۋعا قىزىعۋشىلىق تانىتۋدا، دەپ حابارلايدى "ادىرنا" ۇلتتىق پورتالى.
تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسۇلان ماديەۆتىڭ ايتۋىنشا، ۆەدومستۆو يوردانيانىڭ درون وندىرىسىندەگى تاجىريبەسىن زەرتتەپ جاتىر.
«بۇل ەلدە دروندار يندۋسترياسى جاقسى دامىعان – ديزاين، ءوندىرىس، ينجەنەرلىك جۇمىستار مەن باسقارۋ باعدارلامالىق جاساقتاماسىنا دەيىن. ءبىز بىرنەشە اي بۇرىن دەلەگاتسيامەن بارىپ، ولاردىڭ تاجىريبەسىن زەرتتەدىك جانە رەتتەۋشى ورگاندارمەن كەزدەستىك. بۇل سالادا جۇيەلى رەتتەۋ قاجەت»، – دەدى ول.
ءمينيستردىڭ ايتۋىنشا، ءسوز ازاماتتىق جانە اسكەري دروندار، سونداي-اق انتيدرون جۇيەلەرى تۋرالى بولىپ وتىر. ازىرگە بىرلەسكەن ءوندىرىس تۋرالى ناقتى كەلىسىم جوق، الايدا قازاقستان بۇل باعىتتا بەلسەندى جۇمىس ىستەپ، بولاشاقتا سالانىڭ جاقسى داميتىنىنا سەنىم ءبىلدىردى.
