فوتو جي كومەگىمەن جاسالعان
قازاقستان ازاماتى گرۋزيادا ەسىرتكى جانە پسيحوتروپتىق زاتتار ساناتىنا جاتقىزىلعان ءدارىنى الىپ جۇرگەنى ءۇشىن سوتتالدى، دەپ حابارلايدى “ادىرنا”.
Politico دەرەگىنشە، يۆان چەكۋلاەۆ 16 جىلعا باس بوستاندىعىنان ايىرىلدى.
44 جاستاعى جۇك كولىگىنىڭ جۇرگىزۋشىسى ءساۋىر ايىندا گرۋزيانىڭ پوتي پورتىندا ۇستالعان. ونىڭ ءدارى قوبديشاسىنان بەلىنىڭ قاتتى اۋىرسىنۋىنا بايلانىستى ەمدىك ماقساتتا قولدانعان پرەپارات تابىلعان. الايدا گرۋزيا زاڭناماسىنا سايكەس، بۇل ءدارى ەسىرتكى جانە پسيحوتروپتىق زاتتار قاتارىنا جاتادى.
سوتتالعان ازاماتتىڭ وتباسى التى اي بويى ونى بوساتۋعا ارەكەت جاساعان. تۋىستارى پرەپاراتتى گەرمانياداعى دارىگەردىڭ تاعايىنداعانىن ايتىپ، ونىڭ مەديتسينالىق ماقساتتا قولدانىلعانىن دالەلدەۋگە تىرىسقان. دەگەنمەن سوت ونى كىنالى دەپ تانىپ، 16 جىلعا باس بوستاندىعىنان ايىرۋ تۋرالى ۇكىم شىعارعان.
قازاقستان ءسىم مالىمەتىنشە، ديپلوماتتار بۇل ءىستى باستاپقى كەزەڭنەن بەرى باقىلاۋدا ۇستاپ كەلەدى. كونسۋلدىق قىزمەتكەرلەر سوتتالعان ازاماتپەن كەزدەسىپ، سوت وتىرىستارىنا قاتىسقان، قورعاۋشى تابۋعا كومەكتەسكەن جانە ونىڭ تۋىستارىمەن بايلانىس ورناتقان.
«ديپلوماتتار ازاماتقا كونسۋلدىق-قۇقىقتىق كومەك كورسەتۋدى جالعاستىرادى»، — دەپ حابارلادى ۆەدومستۆو.
ال جۇرگىزۋشىنىڭ وتباسى سوت ۇكىمىمەن كەلىسپەي، اپەللياتسيالىق شاعىم تۇسىرۋگە نيەتتى. وعان ءبىر اي ۋاقىت بەرىلگەن. سوتتالعان ازاماتتىڭ جۇبايىنىڭ ايتۋىنشا، گرۋزياداعى دارىگەرلەر كۇيەۋىنىڭ دياگنوزىنا كۇمان كەلتىرمەگەن. ول نەيروحيرۋرگتىڭ باقىلاۋىندا ەمدەلگەنىمەن، سوتتا ءوز كىناسىزدىگىن دالەلدەي الماعان.
