ۋكراينا پرەزيدەنتى ۆلاديمير زەلەنسكي ۆيكتور مايكونى قازاقستان رەسپۋبليكاسىنداعى توتەنشە جانە وكىلەتتى ەلشى ەتىپ تاعايىندادى، دەپ حابارلايدى “ادىرنا” ۇلتتىق پورتالى.
ۆيكتور اناتولەۆيچ مايكو 1960 جىلى ۋكرايناداعى دنەپروپەتروۆسك قالاسىندا دۇنيەگە كەلگەن. 1982 جىلى تاراس شەۆچەنكو اتىنداعى كيەۆ مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن تامامداعان. 1999 جىلى ۋكراينا سىرتقى ساۋدا اكادەمياسىندا ەكونوميكا عىلىمدارىنىڭ كانديداتى دارەجەسىن العان.
ەڭبەك جولىن جۋرناليست رەتىندە باستاعان مايكو 1982 جىلى كيەۆتەگى انتونوۆ اتىنداعى ۇشاق زاۋىتىنىڭ «زناميا سورەۆنوۆانيا» گازەتىندە ءتىلشى بولىپ جۇمىس ىستەدى. 1989 جىلى ۋكراينا سىرتقى ىستەر مينيسترلىگى جانىنداعى باسشىلىق كادرلاردى قايتا دايارلاۋ ينستيتۋتىنا عىلىمي رەداكتور بولىپ قابىلداندى.
ديپلوماتيالىق قىزمەتىن 1994 جىلى باستاعان ول ۋكراينانىڭ ۇلىبريتانيا مەن يرلاندياداعى ەلشىلىگىنىڭ ساۋدا-ەكونوميكالىق ميسسياسىندا بەس جىل قىزمەت اتقاردى. 2005-2010 جىلدارى ۋكراينانىڭ تۇركىمەنستان مەن اۋعانستانداعى ەلشىسى بولىپ تاعايىندالدى. 2010-2014 جىلدارى ۋكراينا سىرتقى ىستەر ءمينيسترىنىڭ ورىنباسارى قىزمەتىن اتقاردى. 2020 جىلى قايتادان ۋكراينانىڭ تۇركىمەنستانداعى ەلشىسى بولىپ تاعايىندالدى.
مايكونىڭ الدىنداعى ەلشى پەتر ۆرۋبلەۆسكي 2022 جىلى داۋلى سۇحباتىنان كەيىن قىزمەتىنەن بوساتىلعان بولاتىن. وسى جاعدايدان كەيىن قازاقستان مەن ۋكراينا تاراپتارى جاڭا ەلشى تاعايىنداۋ ماسەلەسىن تالقىلاپ، ناتيجەسىندە ۆيكتور مايكو بۇل لاۋازىمعا بەكىتىلدى.
