رف سىرتقى ىستەر ءمينيسترى سەرگەي لاۆروۆ ماسكەۋدە قر پرەمەر-ءمينيسترى – سىرتقى ىستەر ءمينيسترى مۇحتار تىلەۋبەردىمەن رەسمي كەزدەسۋى كەزىندە جۋرناليستەردىڭ سۇراقتارىنا دا جاۋاپ بەردى دەپ حابارلادى “ادىرنا” ۇلتتىق پورتالى zakon.kz-كە سىلتەمە جاساپ.
جۋرناليستەردىڭ ءبىرى: «قازاقستاندا ورىستارعا قىسىم كورسەتىلىپ جاتىر دەگەندى كەيبىر رەسەيلىك باق-تار وزدەرى ويدان شىعارىپ الىپ جۇرگەن جوق پا، ايتپەسە رەسەي فەدەراتسياسىنان سانكتسيالار ەنگىزىلگەننەن كەيىن مىڭداعان رەسەيلىك ونسىز دا كەتىپ جاتىر ەمەس پە؟” – دەپ سۇرادى.
«ەگەر ءبىز اراداعى وداقتاستىق پەن ستراتەگيالىق ارىپتەستىكتىڭ دامۋىنا قاتىستى قارىم-قاتىناسىمىزدى رەسەيدەگى كەيبىر باق-تىڭ جانە قازاقستانداعى كەيبىر باق-تىڭ نەگىزىندە انىقتاساق، ءبىز ناقتى كورىنىستى ءسال بۇرمالاپ الامىز دەپ ويلايمىن. ءاردايىم جوق جەردەن بالە ىزدەۋدى، تۇيمەدەيدى تۇيەدەي كورۋدى قالايتىندار تابىلادى. سوڭعى كەزدەرى قازاقستانعا قونىس اۋدارعان رەسەيلىكتەردىڭ سانى تۋرالى اقپاراتقا قانىق ەمەسپىن، ونىڭ ۇستىنە ولاردىڭ كەتۋىنە نە يتەرمەلەگەندىگىنەن دە حابارىم جوق»، – دەپ اتاپ ءوتتى لاۆروۆ.
ونىڭ پىكىرىنشە، قونىس اۋدارۋ پروتسەسى تابيعي تۇردە جۇرەدى.
«ءبىز باۋىرلاس ەلدەرمىز، ازاماتتارىمىزدىڭ ءجۇرىس-تۇرىسىنا ەشقانداي شەكتەۋلەر قويىلمايدى. ءبىزدىڭ ازاماتتارىمىز دا، قازاقستان ازاماتتارى دا تۇرعىلىقتى جەرىن ءوزى تاڭداي الادى. رف كونستيتۋتسياسىندا مۇنداي قۇقىققا كەپىلدىك بەرىلەدى. بىراق، بۇل ارادا ەڭ باستىسى، ءبىزدىڭ ورتاق مىندەتتەرىمىز. بۇل تۋرالى ءبىزدىڭ پرەزيدەنتتەرىمىز 10 اقپاندا كرەملدە مالىمدەمە جاسادى. رەسەيلىكتەر مەن قازاقستاندىقتار ءبىر-ءبىرىنىڭ اۋماعىندا بولۋىندا ءىس جۇزىندە ەشقانداي ايىرماشىلىق بولمايتىنداي ەتىپ جاعداي جاساۋ تۋرالى ءسوز بولدى. ەاەو شەڭبەرىندە ءبىزدىڭ قارىم-قاتىناستارىمىزدى دامىتۋ ەكونوميكالىق، الەۋمەتتىك جاعدايلاردا وسىعان يكەمدەلۋىنە قول جەتكىزۋدى قامتاماسىز ەتۋگە ارنالعان. پرەزيدەنتىمىز ءبىزدىڭ الدىمىزعا وسىنداي ناقتى مىندەت قويىپ وتىر»، – دەپ ءسوزىن قورىتىندىلادى لاۆروۆ.
