ءماجىلىس دەپۋتاتى ازات پەرۋاشەۆ رەسەيدىڭ ەكس-پرەزيدەنتى مەدۆەدەۆتىڭ ۆكونتاكتە پاراقشاسىندا جاريالانعان جازباسىنا قاتىستى پىكىر ءبىلدىردى. دەپۋتات ءوز ويىن Telegram جەلىسىندەگى پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
«فەيك بولماسا، بۇل نە سوندا؟ اۋرۋ سانانىڭ ساندىراعى ما، الدە، ابايسىزدا اۋىزدان شىققان جاسىرىن قيالدار ما؟
قالاي بولعاندا دا، لاس ءارى قۇرمەتكە لايىقسىز ارەكەت.
«ءۇش ءجۇز جىلدىق يگەرۋگە» قارسى قازاقتار مەن، ءتىپتى، سولتۇستىك وڭىرلەردى دە مەكەندەگەن بابالارىمىزدىڭ مىڭ جىلدىق تاريحىنان تالاي مىسالدى كەلتىرۋگە بولادى; شەكاراسى قازىرگى قازاقستان اۋماعىنان دا اۋقىمدى بولعان، بيلەۋشىلەرىنەن بارلىق قازاق حاندارى تاراعان، قازاق حاندىعى مۇراگەرى سانالاتىن التىن وردانى ەسكە سالامىز. ايتپاقشى، ماسكەۋ كىنازدىگىنىڭ كۇشەيىپ، اينالاسىنا وزگە ورىس جەرلەرىنىڭ قوسىلۋىنا ىقپال ەتكەن دە ءدال وسى التىن وردا.
بىراق، بۇل التىن وردانى قايتا قۇرىپ، بەس ءجۇز جىل بويى تولەنبەگەن سالىقتى تالاپ ەتۋ كەرەك دەگەن ءسوز ەمەس قوي. حالىقارالىق قۇقىق قولدانىستاعى شەكارالاردىڭ بۇزىلماۋىن مويىنداۋدان تۋىندايدى. ءبىز ءۇشىن ەڭ باستىسى – قازاقستاندا ءتۇرلى ەتنوس وكىلدەرىنىڭ تاتۋ-ءتاتتى ءومىر ءسۇرىپ جاتقانى. ەڭبەك ەتىپ، ءوز مەملەكەتى مەن ءوز كاسىپتەرىنىڭ كۇشەيۋىنە قولعابىس قىلۋدا. وتباسىلارىن قۇرىپ، تۋىس تابۋدا، بالا وسىرۋدە. ءبىز ءوز ءومىرىمىزدى ءوزىمىز دۇرىستايمىز.
بىراق، راتسيونالدى ۋاجدەر مۇنداي پروۆاكتسيالاردىڭ اۆتورلارىنا اسەر ەتپەيتىن سەكىلدى، تاعى قايتالايمىن، ەگەر بۇل فەيك بولماسا، ارينە.
قالاي بولعاندا دا، مۇنداي جاريالانىمداردىڭ پايدا بولۋى ويىن ەمەس. بۇل توقتاۋسىز جۋرناليستەر مەن جەرگىلىكتى دەپۋتاتتاردىڭ ساندىراعى ەمەس. اڭگىمە كورشى ەلدىڭ ەكس-پرەزيدەنتى، ياعني، ۇلكەن ساياسي تاجىريبەسى بار ساياساتكەر تۋرالى.
ءبىزدىڭ سىرتقى ىستەر مينيسترلىگى جاعدايدى انىقتاپ، انىق-قانىعىن حابارلاۋ كەرەك.
ايتپەسە، «اق جول» دەمپارتياسىنىڭ فراكتسياسى ءسىم-گە رەسمي ساۋال جولدايتىن بولادى»، دەپ جازدى ازات پەرۋاشەۆ.
”ادىرنا” ۇلتتىق پورتالى
