رەسەيدىڭ سىرتقى ىستەر ءمينيسترى سەرگەي لاۆروۆ قازاقستان پرەزيدەنتى قاسىم-جومارت توقاەۆتىڭ مەملەكەتتەردىڭ اۋماقتىق تۇتاستىعىنا قۇقىعى تۋرالى سوزدەرىمەن كەلىسپەيتىنىن مالىمدەدى. بۇل تۋرالى ول «كوممەرسانت» گازەتىنە بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
تالقىلاۋ قازاقستان باسشىسىنىڭ «ەگەر ۇلتتاردىڭ ءوزىن-ءوزى بيلەۋ قۇقىعى يدەياسىن باسشىلىققا الاتىن بولساق، الەمدە كوپتەگەن وڭىرلىك قاقتىعىستار باستالادى» دەگەن مالىمدەمەسىنە قاتىستى بولدى. لاۆروۆتىڭ ايتۋىنشا، توقاەۆ تەك مەملەكەتتەردىڭ اۋماقتىق تۇتاستىق قۇقىعىن ەسكەرەدى.
«قازاقستان پرەزيدەنتى قاسىم-جومارت توقاەۆتىڭ سول ءسوزىن ەسىمدە ساقتاپ قالدىم. مەن ونىمەن كەلىسپەيمىن. ءبىز كەيىن قازاقستاندىق دوستارىمىزعا ءوز ۇستانىمىمىزدى تۇسىندىردىك. ول ءۇشىن تەك اۋماقتىق تۇتاستىق قۇقىعى بار سياقتى. مەن وعان قازاقستان بۇۇ مۇشەسى بولعاندىقتان، بۇۇ جارعىسىن تولىق كولەمدە قۇرمەتتەۋى ءتيىس ەكەنىن ايتتىم»، — دەدى رەسەي ءسىم باسشىسى.
ول بۇۇ جارعىسىندا حالىقتاردىڭ ءوزىن-ءوزى انىقتاۋ قۇقىعى دا كورسەتىلگەنىن اتاپ ءوتتى.
«اۋماقتىق تۇتاستىق قۇقىعى، ۇكىمەتى سول اۋماقتا تۇراتىن بارلىق حالىقتى وكىلدىك ەتەتىن ەلدەرگە عانا قاتىستى قولدانىلادى»، — دەدى لاۆروۆ.
