راديكالدى «تاليبان» قوزعالىسىنىڭ وكىلدەرى اۋعانستاننىڭ مازاري-شاريف قالاسىنداعى ۇلى اقىن الىشەر ناۋايگە ارنالعان ەسكەرتكىشتىڭ تولىقتاي جويىلعانىن وزبەكستان سىرتقى ىستەر مينيسترلىگىنە راستادى. اۋعان بيلىگى بۇل جاعدايعا وكىنىش ءبىلدىرىپ، ۇلى ويشىلعا جاڭا ەسكەرتكىش ورناتۋعا ۋادە بەرگەن. بۇل تۋرالى وزبەكستان ءسىم ءباسپاسوز حاتشىسى احرور بۋرحانوۆ ءوزىنىڭ Telegram-ارناسىندا مالىمدەدى، دەپ حابارلايدى “ادىرنا”.
بىرنەشە كۇن بۇرىن اۋعان باق-ى مازاري-شاريف قالاسىندا 17 جىل بۇرىن ورناتىلعان الىشەر ناۋاي ەسكەرتكىشىنىڭ بۇزىلعانى تۋرالى اقپارات تاراعان. بۇعان دەيىن ەسكەرتكىشتىڭ ءبىر بولىگى عانا بۇلىنگەن بولسا، ەندى ول تولىقتاي جويىلعان. تالىپتەردىڭ بۇل ارەكەتى تەگى تۇركى پەداگوگتار مەن ساياساتكەرلەردىڭ اشۋ-ىزاسىن تۋعىزدى. ولاردىڭ ايتۋىنشا، راديكالدار وزگە ەتنوستاردىڭ رۋحاني قۇندىلىقتارى مەن ادامزاتتىڭ تاريحي مۇرالارىنا ءمان بەرمەي، ءىس جۇزىندە ەلدىڭ مادەني-تاريحي بولمىسىن «تازارتۋعا» كوشكەن.
بۇل جاڭالىق وزبەكستان سىرتقى ىستەر مينيسترلىگىنىڭ الاڭداۋشىلىعىن تۋعىزىپ، ولار تالىپتەردەن رەسمي تۇسىنىكتەمە سۇراعان. اۋعان ۇكىمەتى ەسكەرتكىشتى قالا بيلىگى بۇزعانىن، سەبەبى ونىڭ تۇرعان جەرى «ۇلى عالىمنىڭ اتىنا لايىق بولماعانىن» تۇسىندىرگەن. راديكالدى قوزعالىس وكىلدەرى دەمونتاج جۇمىستارى اۋعانستاننىڭ مادەنيەت جانە اقپارات مينيسترلىگىمەن دە، قوعاممەن دە كەلىسپەي جۇرگىزىلگەنىن مالىمدەدى.
سونىمەن قاتار، تالىپتەر الىشەر ناۋاي ەسىمىنىڭ تەك وزبەكستان ءۇشىن عانا ەمەس، اۋعانستان حالقى ءۇشىن دە ماڭىزدى ەكەنىن ايتىپ، كورشى ەلگە سەندىرگەن. وسىعان بايلانىستى مازاري-شاريفتە اقىن ءارى ويشىلعا ارنالعان جاڭا ەسكەرتكىش سالىناتىنى جانە مەموريالدىق كەشەن ورناتىلاتىن اۋماققا ونىڭ ەسىمى بەرىلەتىنى حابارلاندى.
21 تامىزدا Nova24.uz اقپارات اگەنتتىگى اۋعان باق-تارىنا سىلتەمە جاساپ، مازاري-شاريفتە الىشەر ناۋايگە ارنالعان جاڭا ەسكەرتكىشتىڭ قۇرىلىسىن باستاۋ ءراسىمى وتكەنىن حابارلادى. شاراعا جەرگىلىكتى اكىمدىك وكىلدەرى مەن وزبەكستاننىڭ باس كونسۋلدىعىنىڭ قىزمەتكەرلەرى قاتىسقان. ايتا كەتسەك، بولاشاق ەسكەرتكىشتىڭ العاشقى ىرگەتاسىن قالاۋ راسىمىنەن كەيىن جينالعاندار ۇجىمدىق دۇعا وقىعان.
